SDHK-nr: 3558

Nos Kanutus Joansson, illustris Regis Swecie ac Norwegie Dapifer, tenore presencium ad publicam deducimus nocionem, quod Anno Domini M. CCC. vicesimo octauo, die Lune, ante natiuitatem beate Marie Virginis proxima in Perlamento(!) Telgis habito inter Helsingos ex parte vna, et Bircharlaboa ex parte altera, in presencia nostra taliter extitit placitatum, videlicet quod extrema pars Helsingie versus aquilonem, que ad amnem dictum Wlv et stagnum Wlvthræsk vsque protenditur, inhabitari et vtique coli debeat absque [inpedicione et inquietacione cuiusquam secundum tenorem litterarum Domini nostri Regis super hoc antea collatarum, quas semper in suo vigore conuenit inuiolabiliter obseruari, et quibus per presentem placitacionem in nullo penitus derogetur, ab hiis tamen qui per officialem Domini nostri Regis in Helsingia constitutum illic ad habitandum loca susceperint siue Birkala fuerint, siue alii quicunque tributum antequam Dominus noster predictus legitime annos etatis attigerit, nemo leuare debebit. Qui eciam officialis inter illos qui illic ceperint habitare de negociis emergentibus jurisdictionem habebit et justicie faciet complementum. Jtem extitit placitatum quod homines siluestres et vagos vulgariter dictos Lappa in suis venacionibus nullus debeat impedire, nec eciam prefatos Birkarlaboa ad eosdem Lappa accedentes, apud ipsos commorantes, vel ab eis cum suis rebus denuo reuertentes, Articulo isto sicut et primo vsque ad prefati Domini nostri Regis Annos legitimos tantummodo perdurante. Jn cuius placitacionis testimonium presentes litteras nostri sigilli munimine duximus roborandas. Datum Anno, die et loco supradictis.