SDHK-nr: 1362

Jn nomine domini amen, Quoniam ut ait apostolus, omnes stabimus ante tribunal, ut recipiat unusquisque propria corporis prout gessit, necessarium esse dinoscitur, extremi iudicij diem, operibus misericordie preuenire, hinc est quod ego Botildis de Vymarkum, sana & incolumis, ac per omnia optime mei compos, diligenti deliberacione prehabita, & maturo consilio, ne me in annis senilibus, repentina morte, tolli contingat de medio intestatam, de bonis mihi a deo collatis taliter duxi ordinandum, Jn primis confero ecclesie Lincopensi, dimidium octenarium terre in serpæbothum, perpetuo possidendum. Jtem fratribus minoribus Lincopie .XV. marchas denariorum, apud quos quandocumque me de presenti seculo continget emigrare ecclesiasticam eligo sepulturam, Jtem ffratribus eiusdem ordinis Sudhercopie, X. marchas denariorum, Jtem ffratribus predicatoribus Skæningie .V. marchas den. Jtem sanctimonialibus in Wretis .V. marchas den. Jtem sanctimonialibus in Askæby, V. marchas den. Jtem ecclesie wirsnungsrum, bona que possideo Gunwatabothum, ita tamen quod omnes prouentus earundem, perpetuo, pro uino, cera, uel alijs diuino cultuj necessarijs, expendantur, huius autem donacionis sev testamenti testes sunt, gardianus sudhercopensis ffrater Jngeldus, cum socio suo ffratre bothwido, ffilius meus thwlpho, Jngo, Thuko, Sywykinus pistor, ciues Sudhercopenses. Vt autem hec mea ordinacio debitum sorciatur finem & effectum, presentem paginam, sigillis suppendentibus, hoc est thwlphonis filij mei, prepositi Sudhercopensis, communitatis ciuitatis ibidem, ac fratrum minorum eiusdem loci feci communiri, Actum anno domini, M°. CC°.LXXX°VII°.