SDHK-nr: 178

Innocentius Episcopus Servus Servorum Dei venerabilibus fratribus universis Episcopis Suediae salutem & apostolicam benedictionem. Aequum est ut qui aliis praeesse desiderat suis praelatis revereri humiliter non erubescat. Caeterum venerabilis frater noster A. Hammaburgensis Archiepiscopus ad sedem Apostolicam veniens graviter questus est, quod cum vobis, sicut est in antiquis privilegiis, Gregorii, Sergii, Leonis, Benedicti, Nicolaj & Adriani Romanorum Pontificum continetur, metropolitico jure praesideat, debitam ei obedientiam subtrahatis, quod profecto a vobis tanto est studiosius corrigendum, quanto subacto populo etiam in hoc bonae conversationis exempla debitores estis impendere. Per praesentia itaque scripta fraternitati vestrae mandamus, quatenus praefato fratri nostro A. Hammaburgensi Archiepiscopo, tanquam Metropolitano vestro, obedientiam & reverentiam deferatis, & nullam ei super hoc molestiam de caetero irrogetis. Datae apud montem Aventinum VI. kl. Junii.