SDHK-nr: 844

Vniuersis christi fidelibus presentes litteras inspecturis. Karulus Legifer werendie. & Hulwildis uxor sua. Salutem in nomine jhesu christo. Cum in hac captiuitate lacrimabili. super flumina babylonis collocati. Eterne uite stabilitatem tanto amplius jntueri compellamur, quanto magis hic aque more instabiliter. & tamquam amaritudine salicis si tamen nobis gustus sanus existit. multis modis in hac uita miserabiliter conturbamur. propter quod jn nomine patris & filij & spiritus sancti amen. Jncertum cunctis mortalibus vite terminum certa uolentes & in coacta deliberacione preuenire. tale de Bonis a deo collatis condimus testamentum. Claustro fratrum grisei ordinis. de noua ualle ubi & sepulturam eligimus ut eorum suffragijs usque ad nouissimum examen cunctis mortalibus terrificum nimis potiri ualeamus. terciam partem uille que uocatur Beth in moaherath que est porcionis nostre damus in nostrorum remissionem peccatorum. Verum quia iuxta augustinum Difficile est multitudinem non exaudiri. & iuxta Salomonem Beatus qui seminat super omnes aquas que sunt utique pauperes christi ut plurium subsidijs post hanc uitam consolari ualeamus. preter predicta cuilibet claustro per totum Regnum Swechie vnam marcham denariorum Elargimur. Vt igitur super predictis firma sit stabilitas & nulla possit in posterum sinistra calumpniacio suboriri. presentem paginam hec ex uero dei timore facta constestantem amborum nostrorum sigillis testimonio Roboramus.