SDHK-nr: 6363

Omnibus presentes litteras inspecturis seu audituris Hemingus Hæmingsson salutem in Domino sempiternam. Tenore presencium recognosco me commutacionem quandam prediorum cum conuentu Risæbægensi(!) fecisse in hunc modum, quod conuentus Risæbærgensis dimiserat mihi predia sua, Nææs dicta, in parochia Kiil terre Vermælandie cum omnibus adiacenciis infra sepes et extra, prope vel remote positis, quomodolibet circumquaque prenominatis, et ego dimiseram sibi bona mea predialia, Wal dicta, modo simili sine omni calumpnia et controuersia iure perpetuo possidenda, alienata a me meisque heredibus racione possessionis predia predicta, prediis vero Nææs cum predictis attinenciis mihi et meis heredibus in perpetuam possessionem liquide assignatis, addita tamen quadam condicione, quod ipsi conuentui ad emendam in triginta marchis denariorum vel duabus lestis annone veraciter obligor per presentes. Datum Ørabro anno Domini m°ccc°l°ii° sexta feria post pasca sub sigillis discretorum virorum domini Nicholai de Thingualdum, canonici Scarensis, Haraldi vicelegiferi Vermalandie, Nicholai Giæddu, Bryniulfi Bøkøløff et Magni Ionson vna cum proprio presentibus apponendis.