SDHK-nr: 16070

In nomine Domini amen. Anno natiuitatis Eiusdem millesimo quadringentesimo tertio, indiccione vndecima, die vicesima mensis Aprilis, hora terciarum uel quasi, in ecclesia ..... pontificatus sanctissimi in Christo patris ac domini nostri, domini Bonifacii, diuina prouidencia pape noni anno quartodecimo, in mei notarii publici testiumque infrascriptorum presencia constitutus personaliter religiosus et circumspectus vir dominus Jo[hannes] procurator et procuratoris nomine religiosorum et honorabilium virorum dominorum . . . talis ecclesie prout de mandato suo sufficienti ibidem producto constabat euidenter, quandam papiri cedulam, appellacionem infrascriptam continentem et per me lectam in medium exhibuit et produxit verborum huiusmodi sub tenore: In nomine Domini amen. Cum appellacionis remedium in oppressorum subsidium dinoscitur institutum, hinc est quod coram te Jo[hanne] notario publico tamquam publica et autentica persona et fidedignis testibus hic presentibus, ego Jo[hannes], procurator et procuratoris nomine honorabilium et religiosorum virorum dominorum talis ecclesie .... animo appellandi, prouocandi, huiusmodi causam ad romanam curiam legitime deuoluendi ac infrascripta faciendi, dico et propono quod licet parrochialis ecclesia beate Marie virginis in oppido . . tali ... diocesis . . . cum omnibus juribus et pertinenciis suis ad prefatos dominos ... per ipsius canonicam incorporacionem et vnionem eisdem dominis et eorum ecclesie de ea tam apostolica quam ordinaria auctoritate . iuxta ordinacionem quandam sui patroni laici rite et legitime factam, et alias iusto titulo et iure, non paucis annis et temporibus pertinuerit et spectauerit pertinere et spectare consueuerit, pertinet atque spectat, pleno jure, prefati domini .... et ego nomine et pro parte eorundem tamquam huiusmodi parrochialis ecclesie legittimus, verus et indubitatus vicarius, rector et gubernator eandem ecclesiam per triennium et vltra cum integrali omnium emolimentorum suorum percepcione disponendorum disposicione iuste et sancte possederimus, rexerimus et gubernauimus, modo supradicto fuimusque et sumus, infrascriptis dumtaxat exceptis in huiusmodi corporali, reali et integra possessione, pacifice et quiete ac pro talibus et vt tales communiter habiti, tenti, nominati et reputati ab omnibus et singulis quorum interfuit seu quomodolibet poterit interesse. Nichilominus tamen quidam N[icholaus] gerens se pro clerico.....diocesis, tamquam fur et latro, non per ostium sed aliunde et viciose anhelans ouile ecclesiasticum subintrare, qui eciam in crimine falsificacionis apprehensus et ex aliis causis est indignus ad quodcumque beneficium ecclesiasticum optinendum, nuper die jouis xvj mensis Decembris anni presentis, hora primarum vel quasi, cum suis in hac parte complicibus prefatos dominos et me eorum nomine quo supra, huiusmodi nostra ecclesia et ipsius corporali, reali, integra, pacifica et quieta possessione, sine quibuscumque literis, processibus, citacione, monicione seu mandatis preuiis, sed pocius temeritate propria et ausu sacrilego, manu armata et modo hostili valuas et portas curie et domus dotis ecclesie iamdicte per vim violenter et potenter, fraudulenter et furtiue subintrando ac non sine sacrilegi commissione effringendo et destruendo, necnon aliquas meas res illicite auferendo et iniuste detinendo nequiter spoliauit et eiecit, seque temere intrusit ac tamquam intrusus eam spoliatam sibi vsurpauit et occupauit ac detinet occupatam, fructus quoscumque ex ea percipiendo minus iuste. Idemque Nicholaus hiis et nonnullis aliis diuersis illicitis, iniustis et iniuriosis modis et viis prefatos dominos et me de et super huiusmodi nostra ecclesia multipliciter molestauit et perturbauit, molestare et perturbare non desistit in ipsorum dominorum non modicum dampnum, preiudicium et grauamen, licet autem a premissis seu eorum aliquo cum sint ipso iure nulli non sit merito appellandum, tamen ad huiusmodi causam et negocium cum omnibus et singulis suis emergentibus, dependentibus, incidentibus et connexis ad romanam curiam et sedem apostolicam legitime deuoluendum, ab omnibus et singulis premissis violenta subintraccione, effraccione, destruccione, detencione, intrusione, spoliacione, vsurpacione, occupacione, percepcione, molestacione et perturbacione omnibusque aliis et singulis grauaminibus premissis et eorum quolibet et que ex eis seu eorum aliquo colligi possunt salua eorum nullitate contra prefatum N. ac omnes et singulos sua in hac parte interesse credentes, ad prefatam romanam curiam nomine procuratoris quo supra prouoco et appello in hiis scriptis, ac apostolos cum debita iuris instancia michi dari peto, siquis sit, qui michi eas dare velit, debeat siue possit, alias de hoc denuo prouoco et appello prout supra, subiciens dictos dominos meos et me eorum nomine quo supra, necnon omnes et singulos eis et mihi in hac parte adherentes seu adherere volentes, necnon nostrorum res, bona mobilia et immobilia, status et personas, proteccioni, defensioni et tuicioni sedis antedicte, de presentis apellacionis, quando, quibus et qualiter insinuanda fuerit, insinuacione, correcione, specificacione alterius et aliarum appellacionis seu appellacionum interposicione et aliis prout stili est et moris publice protestando. Lecta et interposita fuit et est presens appellacio anno Domini, indiccione, mense, die, hora, loco, pontificatu et aliis quibus supra, presentibus discretis viris domino Jacobo et ceteris testibus ad premissa vocatis specialiter et rogatis. Et ego N. huiusmodi appellacioni, interposicioni, leccioni, protestacioni, apostolorum peticioni, omnibusque aliis et singulis premissis, dum sic ut premittitur, agerentur et fierent, vna cum prenominatis testibus etc.