SDHK-nr: 4285

Omnibus presens scriptum cernentibus Syghwidus Ribbing, Capitaneus terre hallandie, kanutus arnwichsen, paulus arnwichsen, petrus porsse et clauus skriware eternam in domino salutem. Noueritis quod anno domini millesimo CCC° tricesimo sexto in crastino exaltacionis sancte crucis in castro Falkenbergh cum honorabilibus viris ac dominis, dominis tythemanno gustrowe, et Johanne Ruffi nunciis ciuitatis lubycensis presencium exhibitoribus tam ex parte ipsorum quam omnium aliorum de ciuitate lubycensi ut eciam ex parte nostra et omnium uolencium facere causa nostri, omnibus et singulis inimicitiis, dissensionibus et discordiarum materiis tam pro homicidio in bardhafiordh, quam aliis excessibus qualitercunque vel quandocunque hactenus commissis et contractis cedatur [d.v.s.: sedatis ?] penitus et radicitus exstirpatus [d.v.s.: - tis], nec vmquam de cetero ad vindictam vel memoriam reuocandis, firmam, sinceram et fidelem fecimus concordie et federis vnionem sub modo placitacionis subsequenti, videlicet quod vtraque pars ipsorum et nostri vbicumque casu vel proposito ipsam conuenire contingat, debeat in posterum caritatiuis promocionibus ad inuicem diligi, honorariter captari mutuoque et fauorabiliter expediri. Et si contingat bona vel mercimonia ipsorum forsan in nauibus emulorum nostrorum vel aliorum quos fecerimus impediri collocata, per nos vel nostros alicubi, quod deus auertat, occupari, ipsa bona vel mercimonia salua et integra restituere debeamus sine dampno, vt autem presens placitacio eo firmiorem habeat efficaciam et vigorem, ipsam non solum cum compromissoribus nostris et fide sub manu coniuncta data, verum et sub euidenti appensione sigillorum nostrorum, sine omni adinuencione subdola vel sinistra, et quacumque praua arte fecimus roborari. Datum sub anno die et loco supradictis.