SDHK-nr: 17203

Witlik sy alle den ghenen, de dessen breeff sehn edder horen lesen, dat wy Herman Swarte, borgermeister tho deme Holme, Claws Brasche, radman dar suluest, Lodewich Durschede vnd Peter van dem Brinke, borghere der erbenomden stat Stocholm, mit vnsen rechten eruen bekennen openbare dat wy mit gudir eendracht vnde mit vrien wol bedochtem mode vnde sunder alle arich, vmme weddirbuwinge vnd vorbeteringe der prebenden, de dar gelegen is in der bkerken tho deme Holme, geheten sunte Andreas koer, der wy rechte leenheren sint, vnde mit vulbort des pristers hern Symon, de nu thur tijd een besitter is der erbenomden prebenden, so hebbe wy vorkoft vnd vorkopen rechtliken vnd redeliken sos mark swedische penninghe ewigher rente sodaner munte also nu in dem rike tho Sweden genge vnd geue is, also de lodige mark also gut sy also achte mark swedisch, alle iar tho der broderschop des hilgen lichams na vnsir stat willekore vor hundirt swedisch mark, vnd desse vorschreuen sos mark ewigher rente sal gaen ut dem bastouen, de dar belegen is by der norder porten, mit alle syner tobehoringe up vnde neddir, vnd desse erbenomde renthe sal utgeuen vnd tho danke betalen de den bastouen nu besid vnd de na em kumpt, to ewigen tiden, tho veer tiden des jares deme oldermanne vnde bysitteren der vorbenomden broderschop, also nu to sunte Johannis dage anstande, dar negist to sunte Michelis daghe, dar na tho wynachten vnd so vort to paschen vnd so vort, van jare to jare to ewigen tiden, sundir jenigherleie vortoch. Dat loue wy Herman Swarte, Claws Brasche, Lodewich Durschede vnd Peter van dem Brinke mit vnsen eruen vnd hern Symon dem oldermanne vnd bisitteren vnd der ganzen broderschaft des hilgen lichams to ewigen tiden, na vnsir stat willekore, stede vnd vaste to holdene zundir jenigherleye argelist eddir hulperede; vnd des tho merem getughe so hebbe wy vnsir allir ingesegele wetende gehangen an dessen breeff. Datum anno Domini m°cccc°ix°, in vigilia natiuitatis sancti Johannis Baptiste et precursoris Domini.