SDHK-nr: 17354

Vor allen luden, de dessen breeff seen, horen eddir lesen, bekenne ik Johannes Westuael, borgermeister tho Stocholm, dat ik mit mynen eruen rechtliken vnd redeliken vorkoft hebbe vnd vorkope ene halue lodighe marc swedischir penninghe alsodaner munte, als nu thur tijd genge vnd geue is in deme rike tho Sweden, also de lodighe marc so gut is also viij marc swedisch myn twe ore, ewighe renthe alle jar uppe sunte Michaelis dach tho betalende deme oldermanne vnde bysitteren der broderschop des hilgen lichams, vnd desse vorbenomde j lodighe marc sal gaen ut myme nyen steenhuse, dat dar licht by der suder porten, up vnd nedder, breet vnd lank, mit allir thobehoringe also ik dat allir beste maken vnd buwen kan; vnd were, dat God vorbede, dat dat hus vorbrende edder jenigerleye schaden neme, it were luttik efte grot, dat sal ik wedder beteren van dem mynen vnd den vorbenomeden oldermanne vnd bysitteren ere wisse renthe allikewol to danke geuen zundir jenigerleye hulperede. Dit loue ik Johannes Westuael vorschreuen mit mynen rechten eruen deme oldermanne, bysitteren vnd den gantzen broderschop des hilgen lichams stede vnd vaste to holden tho ewigen tiden, na vnsir stat willekore, vnd des tho tuge hebbe ik myn ingesegil gehangen an dessen breeff, vnd tho merer zekerheit hebbe ik gebeden de erbaren lude her Euerd Greueroden, ratman tho Stocholme, vnd Diderik Sappen, borgher dar suluest, dat se ere ingesegele hebben mede an dessen breeff gehangen. Datum Stocholmis, anno Domini m°cd°ix°, ipso die Luce ewangeliste.