SDHK-nr: 1225

Vniuersis ad quos presens scriptum peruenerit Ragnildis relicta quondam domini Jøhans karlsun. salutem in domino sempiternam Racio dictat & iuris ordo deposcit legittimas donaciones precipue seruis dei a prioribus pro suorum remissione peccaminum factas a posteris plene et irrefragabiliter debere seruari. Et ne malignancium machinacio possit infringere rite. racionabiliter et & salubriter acta, necesse est facta presencia futurorum noticie transmittere litterarum testimoniis roborata. Prouide ego Ragnildis relicta felicis recordacionis domini Joans karlsun. lacum dictum Musamyr, situm iuxta sictoniam seruis dei fratribus predicatoribus sictoniensibus collatum a domino gera de winagarnum. & a dilecto marito meo supramemorato dictis fratribus confirmatum, ipsorum esse possessione plenaria quantum ad terram, aquam. gramina. ligna. & cetera que loci illius sunt tenore presencium protestor Conuentum autem predictorum fratrum apud quos eciam mihi iuxta maritum meum eligo sepulturam, dono & fauore cupiens prosequi speciali. confero eis, decursus aque de dicto lacu spacium trium brachiorum in latitudine tam per agros quam per plana camporum. & hoc vsque ad molendinum ipsorum. ne quis in posterum ipsorum vtilitatem & commodum per modum aliquem valeat inpedire. Jn cuius rei testimonium siggillum illustrissimi sweorum gothorumque regis domini Magni. & siggillum meum proprium presentibus est appensum Datum sictonie anno domini. M°. CC°.LXXXII°. in dier sanctorum Cosme et damianj.