1639-07-11
Fili.

Condicio corporis mei minus commoda multo me iam tempore afflixit, inprimis à septimanis circiter tribus. Reversus non sine molestiâ domum, medicamenta sudorifera adhibui, non tam sentiens quam sperans levamentum. Ego cuncta divinæ dispositioni commendo.

Mittis mihi cathalogum Bibliothecæ Weidenheimianæ, tibi emptui oblatæ pro 800 imperialibus, eamque studiis tuis accommodatam iudicas si mihi placeat coëmere aut indulgere, ut partem tibi retineas.^a Perlegi cathalogum et reperio egregios authores optimis locis typisque impressos. Verum utrum eo pretio digni sint nec ne haud facilè sine particulari inspectione discrevero. Hac ætate tuâ non tam sollicitum te esse oportet cogendæ bibliothecæ, quam bonis authoribus iisque paucis studiosè inhærendi, atque secundum Senecam id potius dare operam quomodo legas paucos bonosque authores quam quomodo erres per multos.^b Præstat ut cum Deo aliquando egressus patriâ in Belgio aliisve in locis colligas tibi ipsi bibliothecam proprio et doctorum virorum iudicio. Id quidem ferre possum, ut paucos eosque tibi utiles authores, si Weidenheim velit, ex bibliotheca illa tibi retineas, quorum ego pretium illico solvam, ubi intellexero.

Non foret mihi matrique tuæ ingratum, ut ad nos excurreres domum, quo te viderem, progressum in literis tuum cognoscere et de rebus tuis melius disponere possem, haud te retenturus ultra triduum aut quatriduum. Poterimus ita facilius de bibliotheca convenire. Vale. Raptim TidöTijdöö die 11 Julii Anno 1639.

Parens tuus
tui amantissimus Axelius Oxenstierna mp.

Saluta hospitem tuum atque eius uxorem^c meo nomine, meque excusa quod ad eius literas mihi in ÖstergötlandOstrogothiâ redditas nondum ob virium defectum respondere potuerim, facturus amici officium ubi potuero.

Remitto cathalogum librorum Weindenheimianorum [sic!], ut ipse, si velis, adservare possis.

Adress:

Filio meo Erico Oxenstierna Ubsaliæ.