SDHK-nr: 1089

Nicolaus III. mandat universis Episcopis Svetiæ, ut ad Portum Scarensem transmittant pecunias negotio Terræ Sanctæ deputatas in Franciam deferendas per Collectorem apostolicum.Nicolaus &c. Venerabilibus Fratribus ... Archiepiscopo, et universis Episcopis in Regno Svetie constitutis Salutem &c.Tanto ad terre Sancte comoda procuranda vos decet consurgere promptiores, quanto illam eius beavit presentia, cuius effusio sanguinis extitit nostra salus. Cum itaque decima ipsius terre, que proh dolor non sine ignominia Christiani nominis sub Infidelium potestate consistit eiusdem terre subsidio deputata, quedam quantitas pecunie in vestris Civitatibus, et Diocesibus, ut intelleximus, sit collecta Vniversitatem vestram rogamus et hortamur attente per apostolica vobis scripta in virtute obedientie districte precipiendo mandantes, quatenus ob reverentiam Crucifixi cuius in hac parte res agitur, et nostram singuli vestrum pecuniam in locis de decima huiusmodi vestre iurisdistioni subiectis collectam ad portum Scarensem procurent sub custodia fida deferri. Ita quod dicta pecunia postea in Franciam, per dilectum filium Magistrum Bertrandum Amalrici Capellanum nostrum Remensem Canonicum in Svetie et Datie Regnis Collectorem decime a Sede apostolica deputatum deferri possit, seu mitti, ad quod eidem Capellano auxilium, et Consilium quantum in vobis fuerit vos volumus impertiri. Preces autem, et preceptum nostrum sic studeatis sollicite, ac fideliter adimplere, quod eiusdem subsidii exhibitione operis laudabiles comprobemini zelatores, Nosque proinde devotionis vestre sinceritatem dignis in Domino laudibus commendemus. Datum Rome apud Sanctum Petrum VIII. Idus Junij Anno Secundo.