SDHK-nr: 251

Ad Priorem de Cunungelle. Dilectis in Christo Laurentio Priori, & Enrico caeterisque in Coninguhelle Canonicam vitam professis frater Willelmus Sancti Thomae de Paraclito minister indignus sic currere ad bravium vocationis supernae, ut comprehendant. Nostis, carissimi, (scientibus enim loquimur) quod animi, qui veraciter amoris legibus astringuntur, nullo maris discrimine, nullo terrarum spatio discutiuntur. Nec diffitemur, immo verius astruimus, quod sicut ignis olei perfusione validius inardescit, sic amor, si subtrahitur nonnunquam praesentia corporalis, ne mutuis foveatur alloquiis, scriptis tamen recentioribus incalescit. Inde est, quod absentes corpore spiritu praesentes praesentia vobis offerimus, ne vel apud vos concepta dilectio consenescat, vel occasione distantium corporum vis amoris fortasse languescat. Nuperrime vobis conscripsimus statum vestrum certius cupientes agnoscere, ((quem autem)) si fortuna secundior favore divininitatis arrideat, gratulamur: sin rebus vestris tristior ((spiritus)) invideat, damni communis infortunium deploramus. Est enim rationi congruum, ut quod commune datur, communiter sit ferendum. Caeterum ad vestram notitiam volumus pervenire, nos ad partes vestras navem nostram cum brasio in proximo velle dirigere, ut ex hoc fructum debitum percipere valeamus. Verumtamen super hoc volumus vestrae fraternitatis habere consultum, si videlicet nos Regum vestrorum vel aliorum vestrorum timere congressum oporteat. Sit igitur industriae vestrae, nobis vel voce vel scripto praefigere partem tutiorem, ne nos expensam amittere contingat & laborem. Quod totum per latorem praesentium volumus, rogamus impleri.* Dessa årtal uppgifvas af Langebek och Bartholin.