SDHK-nr: 175

Innocentius II(1) servus servorum Dei venerabili(2) Adalberoni Hammenburgensi(3) Archiepiscopo, ejusque successoribus(4) salutem & Apostolicam benedictionem. Ad hoc in beati Petri Cathedra disponente Deo(5) constituti esse aspicimur, quatinus singulis(6) Ecclesiasticis personis suam conservemus justitiam, & qualiter, tam temporaliter, quam spiritualiter earum status integer perseveret, salubriter providere curemus. Dignum etenim & rationabile est, ut sicut sacro-sancta Dei Ecclesia unitatis ac fidei perpetua mater existit, ita nimirum(7) privilegia custodiantur illaesa, & nullis molestiis, nullisque oppressionibus pravorum hominum fatigetur. Saepe utique venerabilis frater noster Adalbero Hammenburgensis(8) Archiepiscopus in praesentia praedecessorum nostrorum felicis memoriae Calixti & Honorii ac nostra questus est Acerum Lundensem & alios(9) Daciae tibi debitam, sicut Metropolitano suo, quemadmodum antiquis privilegiis, Gregorii, Sergii, Leonis, Benedicti, Nicholai, Adriani Romanorum Pontificum continetur, obedientiam derogare. Frequenter autem & a praedictis praedecessoribus nostris Calixto & Honorio, atque a nobis eis mandatum est, ut aut ad tuam &(10) Hammenburgensis Ecclesiae redirent obedientiam, aut si quam super hoc si confiderent justitiam(11) habere, ad Sedem Apostolicam venirent(12) praeparati: ipsi vero Apostolicis contemnentes obedire mandatis, nec venerunt, nec responsales miserunt. Quia igitur lucrum nemo de sua contumacia debet obtinere ex deliberato fratrum nostrorum Episcoporum & Cardinalium consilio tam Lundensem, quam alios Episcopos Daciae tibi restituimus. Ad formam igitur privilegiorum Gregorii, Sergii, Leonis, Nicolai, Benedicti & Adriani, Episcopatus Daciae, Sueciae(13) , Norweigiae(14) , Farriae, Gronlandiae, Halsingaldiae(15) , Islandiae, Scridivindiae(16) & Slavorum, carissimi filii nostri Lotharii Regis precibus inclinati, tibi & per te Hammenburgensi Ecclesiae, suae videlicet Metropoli praesentis scripti pagina confirmamus. Si quae(1) in futurum Ecclesiastica secularisve personae(2) hanc nostrae confirmationis paginam(3) violare tentaverit, secundo tertiove commonita, si non satisfactione congrua emendaverit, postestatis honorisque sui dignitate careat, ream se divino judicio existere de perpetua iniquitate(4) recognoscat, & a sanctissimo corpore & sanguine Dei & Domini Redemtoris nostri Jesu Christi aliena fiat, atque in extremo examine districtae ultioni subjaceat. Cunctis autem haec statuta servantibus sit pax Domini nostri Jesu Christi(5) . Data Romae apud montem Aventinum, per manum Almerici Sanctae Romanae Ecclesiae Diaconi, Cardinalis, Cancellariae VI Kalend. Junii. Indictione XI. Incarnationis Dominicae anno MCXXXIII. Pontificatus vero Domni Innocentii Papae II anno qvart(6) .