SDHK-nr: 3637

Omnibus presentes litteras inspecturis, Otto zwerin, salutem in domino sempiternam. Tenore presencium recognosco me anno domini Millesimo. CCC°. XXIX°. pridie kalendas augusti a venerabili in christo patre, domino Olauo diuina gracia archiepiscopo vpsalensi, ducentas marchas denariorum monete currentis in pecunia numerata mutuo recepisse, in festo beati johannis baptiste iam proximo futuro, ad vltimum persoluendas, Pro qua quidem pecunie summa eidem inpignero duodecim oras terre cum vno solido et quinque denariis in villa norby, parochia ecclesie sancte trinitatis vpsalie, cum omnibus attinencijs ad predictas duodecim oras, et vnum solidum cum quinque denariis terre, spectantibus, infra sepes vel extra, longe vel prope positis, tali condicione, quod si predicta predia, in termino prefato, per me redempta non fuerint, extunc cedant domino archiepiscopo predicto et ecclesie vpsalensi perpetuo possidenda, iuxta estimacionem duorum discretorum, qui ad hoc per nos electi fuerint, quid vel quantum mihi sit superaddendum, si eadem predia taxata fuerint meliora, Jn cuius rei testimonium, sigillum meum presentibus est appensum. Datum vpsalie anno et die supradictis.