SDHK-nr: 5746

Omnibus presens scriptum cernentibus Godzsuenus Bytæroff salutem in Domino sempiternam. Tenore presencium pateat omnibus euidenter, tam posteris quam modernis, me honorabili viro domino Nicholao de Malmoghe, canonico Lundensi, vnum attungum cum dimidio et sextam partem attungi in villa Siowaldæ, parochie Aa, Lincopensis dyocesis, cum omnibus et singulis eorundem bonorum attinenciis vniuersis, videlicet agris, pratis, pascuis, siluis, piscariis, domibus, infra sepes et extra, siccis et humidis, prope et remote positis, nullis penitus exceptis, quocumque censeantur nomine, pro centum sexaginta marcis denariorum vsualium empcionis titulo dimisisse, transferens ipsum et eius heredes in corporalem possessionem predictorum bonorum bona eadem libere absque mei et heredum meorum quorumcumque impeticione, aggrauacione vel molestacione quibuslibet possidendi, habendi, commutandi et pro suis vsibus, quomodocumque voluerint, ordinandi. In cuius rei euidenciam firmiorem sigilla nobilium et discretorum virorum, dominorum videlicet Laurencii Karlsson militis, Petri, prepositi hospitalis Suthercopie, et magistri Sunonis, scolastici ibidem, necnon armigerorum Simonis Haquonson, Johannis Pæterson, Gudhmundi Clæmæzson et Karoli Ruth, huius facti forskiluman, necnon et firmariorum, dictorum fastæ, scilicet Sighmundi de Kumblaby, Ingonis Syllason, Achonis Spiut, Tidechini Fredagxson, Johannis Kasteeli, Hennechini Swarta et Ødholphi Vnga, consulum et ciuium Suthercopensium, vna cum sigillo ville predicte presentibus sunt appensa. Datum Suthercopie anno Domini millesimo ccc°xl°nono tercia feria post dominicam, qua cantatur quasimodogeniti.