SDHK-nr: 6123

Omnibus presens scriptum cernentibus Johannes Olafsson, Helena Østenzdottir, consors eius, Daghfindus Daghfinzson, Joan Arwastason et Esborgh, ipsius vxor, salutem in Domino sempiternam. Transeuntis fluctuose ac instabilis mortalitatis labilis memoria si debeat duracionis autenticari mansuris monimentis, requirit non solum bonorum foueri testimoniis, sed eciam scriptis apud posteros confirmari. Recognoscimus et notum fieri volumus presentibus [et] futuris, quorum interest vel poterit interesse, quod prout ex relatibus veredicorum intelleximus, quod vir prouidus Guthormus Daghfinzson pie recordacionis virum prouidum Karolum Ingibyornason, aduocatum Vallium, in preuisorem et tutorem filii sui Th[y]dekini et omnium bonorum suorum, mobilium et inmobilium, vbicunque situatorum, in extremo tempore vite sue dudum statuit et elegit, ita nos Joan Olafsson, Helena Østenzdottir, Daghfindus, Jon Arwastason et Esborgh predicti, qui nunc sumus tutores predicti Thydekini et bonorum predictorum, memoratum Karolum Ingibyornason in preuisorem, executorem et tutorem Thydekini predicti et bonorum supradictorum, mobilium et inmobilium, presencium et futurorum, facimus et eligimus ad preuidendum bonis premissis [et] puero, prout sibi Thydekino vtilius et commodosius videbitur expedire. Vltimum statuimus et consensimus Karolum Ingibyornason predictum ad exigendum, leuandum et petendum debita Guthormi memorati, vbicunque racionabiliter visa ac inuenta fuerint, necnon creditoribus suis de debitis, secundum quod iustum fuerit, integre satisfaciendi [C: -dum], ratum et gratum habere volentes quidquid per ipsum Karolum actum vel gestum fuerit in premissis. Precipimus insuper predicta bona habentibus vel tenentibus, quatinus Karolo predicto et nulli alteri, cuiuscunque condicionis aut status exstiterit, obedienciam et reuerenciam ac omnimodam iusticiam tamquam vero ac legittimo possessori, in quibus vos requisitos habuerit, efficaciter ostendatis cum effectu. In quorum testimonium et euidenciam, ex quo sigilla propria non habemus, sigilla reuerendorum virorum ac dominorum, scilicet domini Stenari, prepositi in Gangneff, domini Wibrandi, prepositi in Husaby, Gerardi Skiptaræ, aduocati Montis cupri, Gerechini dyækn, Daghfindi Daghfinzson et Ingewaldi pictoris, ciuis Arosiensis, ad nostras instancias presentibus sunt appensa. Datum Throstabæk anno Domini m°ccc°l:mo primo die Iouis proxima ante Gregorii pape.