SDHK-nr: 7759

Ollum monnum Þeim sem Þetta bref sea æder høyra senda Vinalder Hennzasson, prester j Þiorn, Olafuer Jonsson ok Redulfuer a Refshala queÞiu Guz ok sina / Ver villium yder kunnikt gera at ver varom j hia at Valla kirkiu j Þiorn a Krosmesso dagh vm varet a eino are ok fiortughta rikis vars vyrdalaghs herra Magnusar meÞ Gudes naad Noreghs, Suia ok Skane konongs saghom ok hørdom a er Þeir heldo handom saman af eine halfuu Liodolfuer Þoresson(a) . en af annare halfuo Ottar Steinarsson. Var Þat vndi ja ok handa bande Þeirra at Liodolfuer vidergek firir os ok morghom odrom godom monnom at han hafde selt Ottare sex aura boll jardar j Skalna Þorpe j Þegnabear sokn j Ordost frealst ok akæro laust firir huerrium manne / meÞ ollum Þeim lutum ok lunnendom sem till fyrnefndar jardar liggia æder leghet hafua vttan gardz ok innan fra forno ok nyio / ok skøtte . Þa samu jord vndan sek ok sinom arfuengiom / ok vndi Ottar ok hans arfuengia till æuerdleghra eighu till alz odals ok afrædis / vidergek ok Liodolfuer oftnefnder at han hafde vpboret af Ottare fyrsta pæning ok sidarsta ok alla Þes j mellom firir fyrnefnda jord eftir Þui j kaup Þeirra kom / ok till sannynda her vm settom ver vor jnsighli firir Þetta bref, er gort var a deghj ok are sem fyr seghir(b) .