SDHK-nr: 2498

Jn nomine domini amen, Anno eiusdem, Millesimo, CCC°, duodecimo, die decima Mensis Maij, jndictione decima, Pontificatus sanctissimi patris, domini Clementis pape V. anno septimo, Cum inter venerabiles patres et dominos, Elawm, dei gracia archiepiscopum et capitulum Nidrosiense, ac dominum ludowichum, Rectorem ecclesie sancti petri, de Borghund, Nidrosiensis dyocesis, ex parte vna et dominum Arnonem, eadem gracia episcopum, et Capitulum Bergense ex altera, super jure prouidendi, ecclesie farensi, et prouisionis facte de dicto ludowico, esset exorta materia questionis, volentes dicte partes super hiis omnibus, et dependentibus ab eisdem ad viam pacis et concordie deuenire, de communi uoluntate, ac sponte et libere sine omni prauitate de predictis controuersiis et aliis omnibus questionibus, et litibus que uertuntur, uel uerti sperantur, seu uerti possent, racione premissorum inter eos quoquo modo, Et in hoc compromisso expressis, et non expressis, jdem archiepiscopus, et episcopus, et capitulorum predictorum procuratores, pro se ac dictis Capitulis Nec non et idem archiepiscopus pro dicto ludowico concorditer compromiserunt Et consenserunt de alto et Basso, in venerabilem in christo patrem, dominum Nicholaum, Miseracione diuina vpsalensem archiepiscopum electum, constitutum, assumptum ac ordinatum communiter ab eis, tamquam in bonum virum, arbitratorem, Mediatorem, seu amicabilem compositorem, dantes et concedentes eidem, plenam et liberam potestatem, usque ad Triginta dies proximo venturos, postquam idem dominus vpsalensis, et dicte partes, apud Brugum in flandria uenerint, vt de plano sine strepitu et figura iudicij, possit in predictis omnibus, et singulis, examinare, cognoscere., Tam ex agitatis et actis factis coram alijs arbitris et agitandis coram se, Et quod incipiat ibi, vbi alij arbitri dimiserunt, Et partes ad audiendam sentenciam, ordinacionem, seu preceptum uel alia, citare, et diem ad pronunciandum, uel ad aliud prefixam, prorogare, partem contumacem mulctare, pronunciare, diffinire, laudare, arbitrari, precipere alte et Basse sicut ei videbitur expedire, Terminare et ordinare, semel uel pluries jnfra dictum terminum, coniunctim uel diuisim, simul, uel super altera earum, juris ordine seruato uel non seruato, ordinarie uel extraordinarie, diebus feriatis et non feriatis, sedendo uel stando, jn scriptis uel sine scriptis, Et alias quomodocumque et qualitercumque, prout ei videbitur expedire, omni hora et loco, vbicumque et in quibuscumque partibus, ipsum et dictas partes, infra predictum terminum, manere contigerit, Nullo pretermisso obstante, vtraque parte absente uel presente, uel altera absente et altera presente, citata tamen, Et quod possit semel et pluries, et quandocumque suam sentenciam, uel sentencias, laudum uel pronunciacionem, interpretari, declarare, corrigere et reformare infra dictum Terminum, si ei videbitur expedire, Promiserunt itaque dicte partes, archiepiscopus et episcopus, supradicti, pro se suisque successoribus, et procuratores predicti pro Capitulis memoratis, ac dictus archiepiscopus pro dicto ludowicho, pro quo promittit de Rato, sibi inuicem fide data, stare et parere dicto, laudo, pronunciacioni, precepto seu preceptis, per ipsum facto uel factis, sub pena quatringentorum florenorum de florencia puri auri et iusti, ponderis, Condictum est eciam concorditer inter partes quod attestaciones testium, in scriptis redacte, que per priores arbitros et arbitratores non fuerant partibus publicate, tradantur per dictos arbitratores dicto domino vpsalensi, seu parti actrici sub sigillis eorum clause, aperiende coram ipsis partibus, suo tempore per memoratum dominum vpsalensem. Et quod predicta pena semel et pluries, et quociens contra predicta uel aliquid predictorum a quocumque ipsorum, actum fuerit, vel prefatum laudum, seu dictum integre obseruatum non fuerit, in omnibus et singulis Capitulis in solidum committatur, et commissa exigatur, Promiserunt insuper dicte partes omnia in hoc compromisso contenta, et expressa Et quodlibet horum, Tenere et seruare et in nullo contrauenire, uel facere, per se uel per alium, aliquo ingenio, racione uel causa, auctoritate sedis apostolice semper salua, Actum Vienne, anno, et die supradictis, Jn quorum omnium premissorum Testimonium, et Euidenciam firmiorem, predicti domini, Nidrosiensis Archiepiscopus, Bergensis episcopus, et procuratores Capitulorum predictorum, nidrosiensis et Bergensis ecclesiarum, Halwardus arnonis, Canonicus nidrosiensis, Et Hamarensis Ecclesiarum et Audfinnus sigwardi, Canonicus Bergensis, sua sigilla, duxerunt presentibus apponenda.