SDHK-nr: 4147

Omnibus presentes litteras jnspecturis, Magnus dei gracia rex swechie et norwegie salutem in domino sempiternam. Cum tempore puericie nostre venerabilis in christo pater, dominus Olauus bone memorie archiepiscopus quondam vpsalensis, plena tunc ex parte nostra fungens auctoritate deserta loca terre nostre helsingie versus aquilonem pro ampliacione cultus christi eadem inhabitare volentibus dandi et exponendi dilecto et fideli nostro domino Nicolao abyornæson. ampnem dictum pitu. in ipsius terre parte aquilonari situm cum insulis et aquis dictis jnfiordhe aliisque pertinenciis suis omnibus dictis tillidh .. *) excolendum assignauerit Jdemque dominus Nicolaus postmodum circa edificiorum erectionem familiarum inibi collocacionem et alias spaciorum sibi vt premittitur assignatorum culturas et occupaciones congruas grandissimos expenderit sumptus operas et labores jdeo nos jam ad annos discrecionis prouecti predictum ampnem cum suis adiacencijs quibuscumque quas jdem dominus Nicolaus jam actu occupauerat vel in posterum duxerit occupandas sibi suisque heredibus denuo dimittimus et in possessionem perpetuam assignamus Translato in ipsum et heredes suos pleno proprietatis jure et possessionis dominio ampnem et predia predicta, cum suis attinenciis, occupandi vendendi. commutandi. et ad placitum suum quomodolibet aliter ordinandi. Jn cuius rei euidenciam firmiorem. sigillum nostrum. et sigilla venerabilium patrum dominorum. fratris Petri archiepiscopi vpsalensis. karoli lincopensis, Petri skarensis, Egisli arosiensis. styrberni strengnensis boecii vexsionensis, benedicti aboensis episcoporum, necnon et nobilium dominorum kanuti joonsson legiferi osgocie, kanuti magnusson legiferi wesgocie Laurencii vlfsson, gøzstaui tunæson, sunonis joonsson, gregorii magnusson, gislonis elinæson, karoli neskunuxson. vlphonis abyornæson. kanuti folkæson. karoli tukason, anundi røriksson. k[aroli] bendictsson vlphonis philippusson, karoli orestæson, vlphonis gudmarsson, haraldi stubbæ, thurgilli clæmitsson gøzstaui niclesson et jngonis kiætilbyornæson militum, presentibus sunt appensa. actum et datum stokholmis. Anno domini M°, CCC°. tricesimo quinto, dominica palmarum.