SDHK-nr: 42283

Frater Franciscus Karoli presbyter professus conventus Upsalensis ordinis fratrum minorum exponit, quod, cum ipse olim in quodam alio conventu Viborgensi eiusdem ordinis Aboensis diocesis existeret et quidam laicus certum ipsius exponentis socium fratrem eiusdem ordinis gladio evaginato invasisset adeo, quod dictus frater retrocedendo in terram ceciderat, ac alias eundem in terra iacentem insequeretur, dictus exponens quandam balistam dicto laico pertinentem non tamen animo aliquem offendendi sed potius laicum predictum, ne eius socium confratrem interficeret et <ut> a persecutione huiusmodi desisteret, terrendi manibus arripuit ac eam extendendo telum inposuit et ad ipsum laicum dixit “Desinas fratrem meum amplius prosequi et molestari, vel alias te male tractabo”. Quo dicto prefatus laicus dimisso fratre ipsius exponentis volens dicto exponenti apropinquare quendam gladium contra ipsum levavit satagens cum eodem ipsum exponentem verberare. Quod videns dictus exponens timens sibi mortis periculum imminere vel alias enormiter offendi balistam huiusmodi extensam pro defensione manu sua sinistra dumtaxat ante caput suum tenuit ita, quod preter ipsius exponentis voluntatem dicta balista sagittam emisit et casualiter dictum laicum in maxilla taliter lesit, quod ex huiusmodi lesione postmodum diem suum clausit extremum. Cum autem dictus exponens in mortem dicti laici minime aspiraverit et alias, quam ut premittitur, de morte ipsius culpabilis non fuerit ymo de ea valde doluerit, prout dolet de presenti, cupiatque in omnibus suis ordinibus perpetuo Domino famulari, ab aliquibus tamen simplicibus et iurisignaris ac ipsius exponentis forsan emulis in eum labia detraxionis aperire volentibus asseritur ipsum propter premissa homicidii reatum incurrisse et irregularitatis maculam sive inhabilitatis notam contraxisse et propterea in omnibus suis ordinibus ministrare non posse. Ad ora igitur talium et aliorum sibi super hoc in futurum forsan obloqui volentium emulorum obstruenda supplicat sanctitati vestre dictus exponens, quatenus ipsum premissorum occasione nullum homicidii reatum incurrisse, maculam irregularitatis nullam sive inhabilitatis notam contraxisse, sed quod libere et licite in omnibus suis ordinibus ministrare possit et valeat, misericorditer declarare dignemini ut in forma. Fiat ut infra. Iulianus tituli Sancti Petri ad Vincula. Videat eam dominus Anthonius de Grassis. Committatur ordinario et, si vocatis vocandis sibi constiterit, quod exponens vim vi repellendo et se defendendo aliter fugere seu mortem evadere non valeret balistam tenuerit, ut prefertur, et de aliis expositis, declaret, ut petitur.