SDHK-nr: 42442

Ericus Balk presbyter Aboensis diocesis exponit, quod, cum ipse olim capellanus cuiusdam nobilis Erici Tureson militis et capitanei castri Viborgh in confinibus scismaticorum christiane religionis inimicorum Ruthenorum situati existeret, [ab] ob timorem, quem propter continuos dictorum Ruthenorum incursus et insultationes in dictam patriam <haberet>, quandam bonbardam parvam sive scopetam deferre soleret volensque quadam die eandem bombardam experiri, si ingruente necessitate ad tuitionem valida et solida foret, pulvere et globulo plumbeo immissis et igne imposito per portam seu hostium domus clausum, in qua erat, adhibita prius debita diligentia, quod nemo erat, cui nocere posset, emisit seu perforavit hostioque aperto quendam puerum eius consanguinem sex annorum illuc casualiter venientem interfectum preter eius voluntatem invenit. Cum autem, pater sancte, dictus exponens in mortem prefati pueri tunc aspiraverit et debitam antea diligentiam, ne eius obesse posse adhibuerit nec in illius mortem alias, quam ut premittitur, culpabilis fuerit sed de illa ab intimis doluerit, prout dolet de presenti, cupiatque ex magno devotionis fervore in suis ordinibus – etiam in altaris ministerio – ministrare et quecumque sibi in futurum canonice conferenda beneficia ecclesiastica recipere et retinere, a nonnullis tamen simplicibus et iurisignaris ac ipsius exponentis forsan emulis asseritur ipsum propter premissa homicidii reatum incurrisse ac irregularitatis maculam seu inhabilitatis notam contraxisse. Ad ora igitur talium etc. obstruenda supplicat etc., quatenus ipsum propter premissa nullum homicidii reatum incurrisse nullamque irregularitatis maculam seu inhabilitatis notam contraxisse sed premissis non obstantibus in suis ordinibus predictis – etiam in altaris ministerio – ministrare et beneficia predicta recipere et retinere libere et licite posse declarari mandare misericorditer dignemini in forma. Fiat ut infra. Iulianus episcopus Brictonoriensis regens. Videat eam dominus Dominicus de Iacobatiis. Iulianus. Committatur ordinario, ut vocatis vocandis constito de assertis et, quod adhibuerit diligentiam quam diligentissimum orator alias adhibuisset, declaret, ut petitur.