SDHK-nr: 2041

Licet matrimonii contractum in quarto consanguinitatis, vel affinitatis gradu Sacri Canones interdicant, consuevit tamen interdum Sedes apostolica super hoc devotorum, et maxime personarum sublimium inducta precibus dispensare. Petitio quidem carissime in Christo filie Ingeburg Sororis carissimi in Christo filii nostri Burgerii Regis Svetie Illustris nobis exhibita continebat, quod cum olim post mortem cl. mem. Erici Regis Datie per potentiam, et malitiam inimicorum eius Regnum Datie oppressum foret multipliciter et collapsum, magnificus Princeps Ericus Rex Datie Illustris eius filius pro tuitione, ac defensione sua, et dicti Regni cum eadem Ingeburg, de cuius Patris presidio propter hoc plurimum confidebat matrimonium de facto per verba de presenti contraxit, et carnali postmodum copula subsecuta jam per plures annos cohabitavit eidem. Verum quia ipsi Rex Datie, et Ingeburgh quarto se gradu consanguinitatis contingunt fel. rec. B. P P. VIII. Predecessor etiam noster ad ipsius Regis Datie supplicationis instantiam super impendenda eis in hac parte dispensationis gratia tibi tunc Archiepresbitero Carcassonensi Cappellano suo, quem pro quibusdam negotiis ad partes illas transmiserat, suas certi tenoris litteras distinavit, set tu de partibus ipsis rediens, quod tibi mandabatur in eis exequi nequivisti, propter quod ex parte dicte Ingeburgh nobis extitit supplicatum, ut cum ex ipsorum Regis Datie, et Ingeburgh separatione, si fieret maxima scandala, odia, et guerre possent de facili exoriri, providere sibi ac dicto Regi Datie, qui nisi esset infrascripta excommunicatione ligatus una cum ea super hoc humiliter sup* plicaret de oportune dispensationis remedio dignaremur. Nos vero, qui fidelium tranquillitatem appetimus, et salutem huiusmodi scandalis odiis, et guerris obviare volentes fraternitati tue, de qua fiduciam gerimus in Domino specialem per apostolica Scripta mandamus, quatenus si premissis veritas suffragatur cum eisdem Rege Datie, et Ingeburgh postquam idem Rex Datie ab excommunicationis sententia, qua propter captionem , et detentionem Venerabilis fratris nostri I. Rigensis tunc Lundensis Archiepiscopi, ac quondam Jacobi Prepositi Ecclesie Lundensis tenetur astrictus iuxta commissionem super hoc per alias nostras litteras tibi factam rite fuerit absolutus, imposita ipsis pro eo quod taliter absque dispensatione apostolica contraxerunt, nec non pro copula, et cohabitatione predictis penitentia salutari eisque ad tempus iuxta tue discretionis arbitrium carnali commercio interdicto, quod in eodem matrimonio remanere licite valeant, impedimento quod ex dicta consanguinitate provenit non obstante per te vel alium, seu alios auctoritate nostra dispenses, prout secundum Deum animarum ipsorum saluti videris expedire, prolem susceptam, et suscipiendam ex eodem matrimonio legitimam nuntiando. Datum Laterani VII. Idus Novembris Anno Primo.