SDHK-nr: 5875

Vniuersis presentes litteras inspecturis Karolus, curatus ecclesie in Hualstadhum, salutem in Domino sempiternam. Nouerint vniuersi, tam posteri quam presentes, quod anno Domini m°ccc°xlnono in vigilia beati Thome apostoli, constitutus in Sekkistadhum in presencia venerabilis patris et domini mei, domini Siggonis, diuina miseracione episcopi Scarensis, bona mea omnia in villa Hiulum sita, videlicet quatuor colonias cum earum pertinenciis quibuscumque, quocumque nomine censeantur, ecclesie Scarensi ad mensam episcopalem racione testamenti mei legaui et ad manus eiusdem venerabilis patris tradidi necnon scotacione legitima assignaui, hac adiecta condicione, quod in die anniuersarii mei fiant in choro Scarensi missa et vigilie pro anima mea. Et episcopus, qui pro tempore fuerit, canonicis, qui predictis misse et vigiliis interfuerint, vnam marcham denariorum annuatim ad distribuciones soluere teneatur. In cuius testimonium et euidenciam firmiorem sigilla reuerendorum virorum, dominorum videlicet Hagbardi de Hagabodhum, canonici Scarensis, Petri de Vplandum et viri discreti Thirneri Bænason, qui tunc presentes fuerunt, cum aliis pluribus fidedignis vna cum sigillo meo proprio presentibus sunt appensa. Datum et actum anno die et loco supradictis.