SDHK-nr: 6870

In nomine Domini amen. Cum secundum apostolum omnes quidem homines corporaliter resurgere habent de factis racionem propriis ineuitabiliter reddituri atque secundum meritorum exigenciam remuneracionis stipendia eternaliter adepturi, ob hoc ego Henricus presbiter, antiquus scolasticus Aboensis, de bonis michi a Deo temporaliter concessis per modum, qui subsequitur, meum condo testamentum. In primis lego in honorem sancti Andree apostoli altari beati Gregorii, ante cuius gradus meam eligo sepulturam, bona mea immobilia cum curia in Luntha situata ac inuentario tali modo confecto, videlicet vi vaccis mulgentibus, duobus bobus domitis in vectigali, vi capris antiquis et totidem ouibus ceterisque vtensilibus curie eiusdem; insuper curiam meam in Abo cum suo inuentario, videlicet i maiori culcedra, duobus nouis lintheaminibus, i lodice, i tapeto, duobus puluenaribus et i cussino dicto ørnegat, i mensali, i manitergio, i lauatorio, i pelui, ii caldariis, iii ollis, i craticula, i frixorio, i securi, i vacua lagena ceruisie, duabus dimidiis lagenis, ii amforis stan[n]eis, ii amforis ligneis cum ii doliis et i caldaria de tintinabulo, i mola dum pistrinis instrumentis; insuper altari predicto, vt premittitur, imaginem sancti Andree apostoli de triginta marcis, i capellam integram, i breuiarium emptum pro xiiii marcis, i missale. Item prebendatus sepedicti altaris i missam de sancto Andrea et aliam pro fidelibus defunctis qualibet ebdomeda (C: ebdomade) sine diminucione qualibet in vestimento (?) sacerdocii plene (C: -no?) dicat, nullatenus omissurus; item cuilibet chorali in exequiis funeris mei presencialiter existenti ii oras(!). Item conuentui fratrum predicatorum in Abo iii marchas; item domino Magno Alendensi(!) sermones super ewangelia et epistolas per totum annum; item fratri Johanni Gladda i calicem viaticum cum lapide altaris consecrato; item hospitali i psalterium commune sanctorum et i legendarium cum historiis ab aduentu Domini vsque ad iiii diem penthecostes; item Iohanni, dicto Brodherson, vnum librum legis Sudhermannice; item colono meo Nicolao i togam duplicatam cum capucio. Insuper nouerint vniuersi, quod dilecta soror mea Cristina michi omnimodam prediorum patrimonialium suorum porcionem hereditariam in Linite (C: Luntha) iure perpetuo possidendam et penitus ordinandam resignauit. De me e conuerso curiam meam in Abo, propriis meis sumptibus constructam, in qua nunc Elena Bacarris residet, et fundum, quem Thomas Pernuus(1) pronunc habet, resumpsit. Ceterum Conrado, dicto Paris, genero ipsius, racione dotalicii cum filia sua Katerina, pro sepedictis prediis in Luntha xxxv marchas solui, presentibus viris discretis, vt satis constat. Item si soror mea hec, que dicta sunt, obseruare quomodo distulerit, michi omnia restituat supradicta cum laboribus et expensis in curia mea memorata Luntha in structura domorum inibi tunc consumptis. Ceterem (C: -rum) nouerint vniuersi, quod tempore, quo discretus vir Hennichinus Øslare dilectam sororem meam Cristinam prescriptam in matrimonialem copulam duxit, lx marchas, agrum Pahimenth, in ornatu vestium, in dotalicio et expensis sibi dedi. Item declaro, quod percepcione v marcharum de Luntha deriuandarum et residencia in curia in Abo, quamdiu vixero, personaliter vti volo, cum eciam approbatum in sacris canonibus euidenter inuenitur, quod testamentum tantum morte confirmatur et post mortem immobile perseueret. Acta et scripta sunt hec anno Domini m°ccc°l° quinto in octaua apostolorum Petri et Pauli sub sigillis reuerendi domini, domini Henrici, prepositi Aboensis, Dethmari Lydhinsket, Conradi pictoris meo proprioque sigillo in huius rei euidenciam firmiorem. Item seniori conuiuii beati Nicolai i mensale pro tabulo suo, quod Conradus pictor exhibebit. Item filio eiusdem Conradi v libros decretales cum apparatu et omnibus libris veteris artis cum suis scriptis et glosis.