SDHK-nr: 9006

Magnifico et illustri principi ac domino, domino Buxslauo, duci Stetynensi ac principi Ruyanorum, suo fautori gracioso, consules ciuitatis Lubicensis affectuosi seruiminis, reuerencie et conplacibilitatis, quantum possunt. Vestre dominacionis litteras continentes, spolium in Hassonem, Stubben, ciuem vestrum Camynensem, per nostrates in bona tranquillitate esse perpetratum, honorifice suscepimus, satis euidenter generositati vestre presentibus desuper reformantes, nos dicto Hassoni per vos ad nos legato coram nobis constituto per diligentem lympidamque interrogacionem proposuisse, quod, si ipse aliquem seu aliquos ex nostratibus super aliquo forefacto incusare pretenderet, quod illum vel illos nomine vel cognomine nobis notificaret, vellemus illum vel illos sibi juri sistere et super singulis incusacionibus seu querelis ei mediante iuris nostri ordine ordinare iusticie complementum. Qui respondendo affirmabat, se nullum ex nostris scire, quem super aliquo posset incusare, adiciens, suas causam et querelas in litteris consulum de Drelleborgh patenter clarere. Ad quod ei dixeramus, sicuti dicimus et respondemus per presentes, quod ipsi iam dicti consules de Drelleborgh in dictis suis litteris nullas singulares personas ex nostris, ymmo nullum ciuem aut familiarem nostrum nominetenus exprimunt, qui huiusmodi factum fecisse debuisset, preterea esset nempe grauis actio et causa absurda, sic alicui quid obicere sine racione et declaracione, quyn oporteret reum notificari et factum probacionibus demonstrari. Idcirco dominacioni vestre venerande supplicandum duximus presentibus quam attente, quatinus vltra hoc nos et nostrates non molestetis nec perturbetis, habentes nos de premissis supportatos, et, prout semper consueuistis, nos et nostros dignemini sinceriter promotoshabere cum effectu, nostri voluntarii seruicii interuentu, scituri procul dubio, quod, si sciremus aut aliquatenus experiri possemus aliquem seu quemcunque ex nostris reum in hac parte, ad hoc tantum facere vellemus, quantum oporteret, ymmo tantum, quantum in simili a vobis recipere vellemus, cupientes vobis in omnibus nobis possibilibus effectiue complacere. Altissimus vos conseruet feliciter et longeue. Datum die sancti Thome Canthuariensis, nostro sub secreto.