SDHK-nr: 16862

Vniuersis, ad quos presens scriptum peruenerit, Abram Brothærsson miles sinceram in Domino dileccionem cum salute. Alma mater ecclesia, quam sibi sponsus supernus, qui pro filiis hominum extat speciosus, vinculo dileccionis associauit necnon singulari libertatis priuilegio orbi protulit vniuerso, votiue prosperitatis successibus gratuletur et vt eius potestas longe lateque, superni fauoris auxilio suffragante, in predicti sponsi laudem protendatur, temporalium bonorum possessionibus per fidelium largiciones merito extollatur, nuper siquidem ego Abraham Brothersson, miles predictus, ad sacrosanctam metropolitanam Lundensem ecclesiam specialem gerens dileccionem, in ipsa ecclesia vnam perpetuam vicariam, videlicet vnum altare ad honorem et laudem omnipotentis Dei et internerate virginis matris eius Marie, consensu venerabilis in Christo patris, domini Jacobi, Dei gracia archiepiscopi predicte Lundensis ecclesie, et capituli sui dilecti ad hoc vnanimiter et beniuole accedente, de nouo construi et fundari feceram bonorum possessionibus et dotari, ita quod supra dictum altare qualibet die perpetuis temporibus vna missa de domina, hora congrua, prout ibidem officianti secundum qualitatem aliorum officiorum in predicta ecclesia peragendorum melius et commodosius videbitur expedire, diuina prouidencia disponente irremissibiliter decantetur, ad cuius inisse et altaris perpetuam perseuerenciam et sustentacionem bona infrascripta videlicet septem curias et vnam fæstæ in Lockorpæ sitas et vnum molendinum in Saxstorpæ, que bona de Ploghpænning emi, item in Æmidhzløff septem curias eum molendino ibidem et vnam curiam in Knydhzlingæ ibi prope, cum omnibus istorum bonorum pertinenciis, videlicet agris, pratis, siluis, paschuis, humidis et siccis, demptis nullis quocumque et qualicumque nomine censeantur, que ad predicta bona spectant in parte vel in toto, a me et heredibus meis ad predictam vicariam dono, scoto per presentes libere et resigno, in qua vero vicaria michi et heredibus meis juspatronatus et auctoritas presentandi penitus reseruetur, nisi diuina voluntas ita ordinaret, quod post decessum meum nullus de cognacione mea remaneret, cui de jure in eadem vicaria juspatronatus competeret, extunc predicte Lundensi ecclesie venerabilis archiepiscopus postmodum in perpetuum ipsi vicarie predicte, dum vacauerit, de sacerdote ydoneo, qui in ipsa vicaria missas cantatas m omnibus, vt premittitur, debite peragat, collacione ordinaria prouidebit, cum autem nemo propriis stipendiis tenetur militare, eciam nostra qui spiritualia amministrat non inmerito temporalia repertabit, protestor in hiis scriptis vt sacerdos ydoneus, cui per me vel heredes meos vel predicte Lundensis ecclesie ordinarium, si jus tali modo vt premittitur ad eum deuoluitur, de predicta vicaria prouisum fuerit, omnia predicta bona cum omnibus suis attinenciis sub libera ordinacione sua et pro vsibus suis in omnibus habeat et disponat fructus et pensiones ac alios vsus inde prouenientes subleuandi, propter quod idem sacerdos per se vel per alium loco sui predictam missam de domina cottidie, vt prefertur, sine aliqua pretermissione decantabit. In cuius fundacionis et dotacionis firmiorem et certiorem euidenciam sigillum meum voluntarie et scienter presentibus duxi inpendendum, rogans attente reuerendum in Christo patrem dominum Jacobum, Dei gracia predictum Lundensem archiepiscopum, ac venerabile capitulum suum ibidem, dominos Swenonem Sturæ et Thuræ Stensson milites, Swenonem Baad et Petrum Nichlæsson, vt sigilla sua presentibus apponere dignentur in confirmacionem et approbacionem omnium premissorum. Datum anno Domini m° quadringentesimo septimo, dominica, qua cantatur officium misericordia Domini.