SDHK-nr: 2796

Venerabili in christo patri, domino suo, Domino olauo dei gracia vpsalensi electo consecrato, Totique suo capitulo, Capitulum scarensis ecclesie Tam voluntaria quam debita seruicia, et omnimodam in omnibus quibus potest reuerenciam, Cum salute in domino perhenni, Quia reuerendum virum, dominum benedictum prepositum nostrum, nobis et ecclesie nostre, per mortem venerabilis patris domini bryniulphi quondam episcopi nostri bone memorie, ad tempus pastoris solacio desolate, vnanimiter elegimus et prouidimus in episcopum, et ipsius successorem, Notificamus vobis quod discretos viros dominos iohannem bendictson et hemfastum concanonicos nostros, facimus, constituimus et ordinamus nostros veros, certos, et legittimos procuratores, ac nuncios speciales, et quemlibet eorum in solidum, ita quod non sit melior condicio occupantis, sed quod vnus inceperit, alter prosequi possit, ad comparendum et se presentandum coram vobis, ac ad petendum ex parte nostra et nomine nostro, confirmacionem prouisionis seu eleccionis nostre de dicto domino benedicto celebrate, immo et eciam munus seu consumacionem consecracionis, opportuno tempore a reuerenda paternitate vestra et vestro collegio venerando, per benignum patrocinium et faorabile consilium, vtiliter inpendende, Dantes eisdem procuratoribus nostris et cuilibet eorum in solidum sicut dictum est, plenam, generalem et liberam potestatem premissa prosequendi, et pro prestanda sedi vpsalensi obediencia debita, in animas nostras seu animas dictorum Procuratorum nostrorum, prout canonicum fuerit, et sufficere seu expedire videbitur, iurandi, ac omnia et singula faciendi que necessaria fuerint, ad dicte eleccionis seu confirmacionis negocium prosequendum, et ipsius effectum seu expedicionem quoquo modo contingere dignoscuntur, et Promittentes firmiter, nos, gratum, ratum et firmum perpetuo habituros, quicquid per dictos procuratores nostros, actum, gestum, procuratum ve fuerit in premissis vel quolibet premissorum. Nos igitur a vobis, post mortem supradicti reuerendi patris nostri domini bryniulphi quondam episcopi nostri, a nobis vobis intimatam, tam salubri, quam sinceri affectus, consilio, in perplexitatibus nostris releuati, et quamplurimum confortati, audaciam ad petenda recipimus ampliora, Cum omni quo possumus affectu supplicantes, Quatinus benignitate, beniuolencia et fauore a sede vestra vpsalensi, ad scarensem ecclesiam habitis specialiter, et a retroactis temporibus semper habere solitis, dicte eleccioni nostre seu prouisioni de dicto domino preposito celebrate, et maxime propter grauitatem persone sue, et vt parcatur laboribus et expensis, ipso absente et non comparente personaliter, velitis et dignemini munus confirmacionis inpertiri Jn quorum testimonium sigillum nostrum commune videlicet sigillum capituli scarensis ecclesie, presentibus est appensum, Datum et actum scaris, anno domini. M°. CCC°. X VII°. sabbato, Sicientes.