SDHK-nr: 19133

Nouerint vniuersi, quorum interest vel interesse poterit in futurum, quod nos fratres Nicolaus Olaui, lector sentenciarum, Hermannus Arosiensis, Petrus Frigus, Olauus Fos, Olauus Pauli, Magnus et Andreas Sacrista, presentes sacerdotes in conuentu Aboensi, fratrem Laurencium Olaui, priorem nostrum, de omni computo in retroactis temporibus quittum et acquietatum dimittimus per presentes, eidem pro grauibus laboribus ac sollicitudinibus suis pro bona reformacione et edificacione conuentus graciarum acciones referentes, et nichilominus, de sua fidelitate et sana consciencia in futurum confidentes, ipsum de computacionis labore ac sollicitudine a datis presencium per futuram yemem vsque ad proximum festum pasce vnanimi consensu dimittimus et habere volumus supportatum. In cuius acquietacionis et supportacionis euidens testimonium sigillum conuentus nostri duximus presentibus appendendum. Datum in conuentu nostro Aboensi, anno Domini mcd° decimo octauo, in vigilia beati Laurencii martiris gloriosi. Et ego frater Gregorius, lector Stokholmensis et reuerendi patris, fratris Raymundi, prioris prouincialis Daciæ vicarius in conuentibus marittimis, in predicti computus acquietacone et eiusdem vlteriori relaxacione, vt prefertur, presens fui atque consideracione laborum et confidencia sane consciencie supradicti prioris premissa omnia tamquam racionabiliter facta approbaui et idcirco presentibus rogatus apposui signetum meum personale.