SDHK No: 1328

Brynulfus miseratione diuina Scarensis ecclesie episcopus, Dilectis sibi in christo filiis. Priori. & fratribus ordinis predicatorum in conuentu Siktoniensi, salutem in domino ihesu christo, Licet is de cuius munere venit, ut sibi a suis fidelibus digne & laudabiliter seruiatur, de habundancia pietatis sue, que merita supplicum excedit & uota, bene seruientibus multo maiora retribuat quam valeant promereri, Nichilominus tamen cupientes populum domino reddere acceptabilem, christi fideles ad complacendum ei, quasi quibusdam premiis illectiuis, indulgenciis videlicet & remissionibus inuitamus, Vt exinde reddantur diuine gracie apciores, Vt igitur ecclesia vestra congruis frequentetur honoribus, omnibus vere contritis & confessis, qui eandem ecclesiam in die parasceues ob reuerenciam saluatoris nostri crucifixi, & in vtroque festo sancte crucis, & in singulis festiuitatibus beate marie semper virginis, & beate marie magdalene atque Katerine, & vndecim milium virginum, & in sollempnitatibus beatorum confessorum Augustini episcopi & Dominici, ac beati Petri martiris, Necnon & in secunda die natiuitatis domini, Pasche & Pentechostes, ac per earundem festiuitatum seu sollempnitatum octauas cum reuerencia & honore visitarint. De omnipotentis dei misericordia & gloriose semper virginis matris eius marie auctoritate confisi, Quadraginta dies de iniunctis sibi penitenciis, annis singulis relaxamus. Datum Wernem Anno domini M°CC°LXXXVI°.