SDHK-nr: 1747

Universis præsentes literas inspecturis, Bryniulphus Dei Gratia Episcopus Scarensis, & Ysarus eadem Dei Gratia Stregnensis, salutem in Domino sempiternam dicunt. Licet is, de cujus munere venit, ut sibi a fidelibus suis digne et laudabiliter serviatur, de abundantia pietatis suæ, quæ merita supplicum excedit & vota digne servientibus, multo majora retribuit, quam valeant promereri. Nihilominus desiderantes reddere populum Domino acceptabilem, Christi Fideles ad complacendum, & quasi quibusdam allectivis muneribus, indulgentiis videlicet & remissionibus invitamus, ut exinde Divinæ misericordiæ reddantur certiores. Cupientes ergo, ut Ecclesia Beati Olavi in Arbuga, Dioecesis Arosiensis, dignis honoribus & devotione populi frequentetur, omnibus vere pænitentibus & confessis, qui eandem Ecclesiam in quatvor Festivitatibus Beatæ Virginis & in anniversariis dedicationis ejusdem ecclesiæ; ac in Festo Beati Olavi Martyris; nec non in solennitate Apostolorum Petri & Pauli, cum reverentia & honore visitaverint, de Omnipotentis Dei Misericordia XL dies, dum modo ad id dioecesum consensus accesserit, annis singulis misericorditer relaxamus. In cujus rei testimonium Sigilla nostra præsentibus duximus adponenda. Datum apud Arbuga A:o Domini MCC nonagesimo septimo XVIII Kalend. Julii.