SDHK-nr: 2515

Jn nomine domini amen, Anno eiusdem M°. CCC°. duodecimo tercia feria proxima ante exaltacionem sancte crucis, Ego ingridis swantæpolcs dotter biærgsætrurn constituta attendens quod nichil est morte certius et nichil incertius hora mortis diem extremum misericordie operibus cupiens preuenire, et de bonis mihi a deo concessis anime mee salubriter preuidere, sana mente et corpore testamentum meum condo et ordino jn hunc modum, videlicet quod in primis do et lego ecclesie beate virginis scaris jn qua sepulturam eligo, ad mensam episcopalem curiam meam in otarstadhum cum omnibus bonis mobilibus et immobilibus ac omnibus suis pertinencijs intra sepes et extra Hoc adiecto quod episcopus scarensis teneatur satisfacere capitulo suo pro anniuersario meo singulis annis jn ecclesia scarensi cum vigilijs et missa sollenniter celebrando,, Jtem do et lego eidem ecclesie beate virginis scaris centum marchas denariorum, ita quod viginti marche de ipsis ad ornatum interiorem eiusdem ecclesie et octoginta marche ad fabricam deputentur,, Jtem do et lego capitulo scarensi duos baldikinos,, Ecclesie beati petri ibidem marcham et aliam sacerdoti, Ecclesie beati laurencij ibidem, marcham, et aliam sacerdoti ac ecclesie beati nicolai ibidem marcham et aliam sacerdoti,, Jtem do et lego ecclesie Lyncopensi ad fabricam viginti marchas denar. Fratribus minoribus sudhercopie decem marchasdenar.,, sanctimonialibus in wretom .X. marchas denar., Monasterio jn alwastrum .X. marchas denar.,, Jtem monasterijs et hospitalibus jn regno swecie constitutis cuilibet tres marchas denar.,, Jtem cuilibet ecclesie ja cuius parochia curias habeo, marcham denar. et aliam sacerdoti,, Pro istis autem omnibus persoluendis obligo curias meas dudhraholth, strømsrum, alem, legiæwi, et rocnaby cum omnibus bonis mobilibus et immobilibus colonijs, molendinis et singulis pertinencijs intra sepes et extra, volens quod nullus me mortua de dictis bonis se aliquatinus intromittat preter episcopum scarensem quicumque pro tempore fuerit, quia ipsum exsequtorem constituo huius mei testamentj adiciens quod ipse statim a die obitus mei prouisionem et ordinacionem dictorum bonorum sibi assumat et libere habeat contradiccione cuiuslibet non obstante, donec per me legata de bonis ipsis integraliter fuerint persoluta, quibus solutis bona predicta ad heredes meos libere deuoluantur, Testes autem qui huic mee ordinacioni vocati per me specialiter et rogati interfuerunt sunt isti, videlicet venerabilis pater dominus bryniulphus episcopus scarensis, dominus benedictus ibidem prepositus, haquinus bryniulphsson et magnus waldemarsson quorum eciam omnium sigilla ad instanciam meam vna cum meo proprio presentibus sunt appensa.,, Actum, Anno, die et loco supradictis.