SDHK-nr: 6155

Vniuersis presentes litteras inspecturis Petrus, diuina miseracione Lundensis archiepiscopus, Suecie primas, salutem in omnium Saluatore. Ad perpetuam memoriam constare volumus vniuersis, quod anno Domini mcccl primo tercia feria proxima post festum palmarum in capella nostra in choro australi ecclesie nostre Lundensis in presencia nostra vir discretus et honestus dominus magister Jonas Litle, Lundensis et Roskildensis ecclesiarum canonicus, nomine et ex parte domine Ingeburgis Jönesdother, matris sue dilecte, cuius ad infrascripta mandatum habebat sufficiens et speciale, personaliter constitutus, ad altare per dominam Ingæ bone memorie in ecclesia nostra Lundensi constructum pariter et dotatum, quodque in presenti tenet Effrardus Effrardi, acolitus nostre diocesis, bona infrascripta, vnam videlicet curiam in Hökestorp, in qua residet Trugillus Lang, et tres curias in Ströö in Othensheret sitas, vnam, in qua Nicolaus Mæiosson, vnam, in qua Johannes Jutæ, et vnam, in qua Nicolaus Brwn residet, cum estimacionibus, agris, pratis, pascuis, siluis ceterisque ipsarum curiarum attinenciis, mobilibus et immobilibus, nomine et ex parte matris sue predicte addidit, scotauit, predicto Effrardo pro se et successoribus suis scotacionem huiusmodi acceptante, necnon ad manus tradidit in perpetuum possidenda, volens et constituens nomine quo supra, quod idem Effrardus, nunc ipsius altaris persona, et qui pro tempore fuerit sub ordinacione, sua bona habeat supradicta, condicione tali annotata, quod persona dicti altaris tres missas in remedium anime eiusdem domine Ingeburgis, vnam scilicet in commemoracionem defunctorum, vnam de omnibus sanctis et terciam de sancta Maria, matre Christi, et Margareta virginibus, in qualibet ebdomada alternatim per se vel per vicarium ydoneum in dicto altari perhenniter celebrabit. In cuius rei testimonium sigillum nostrum, dicte domine Ingeburgis, sororis nostre dilecte, Jacobi Jönesson de Markøghe et Andree Niclæsson de Skaprwse militum, dicti magistri Jone canonici, Dauidis Andersson et Esgeri Krok armigerorum presentibus sunt appensa. Actum et datum anno, die et loco supradictis.