SDHK-nr: 9950

(- - - 2-3) Vortmer warf bischop Gotschalk van des koninghes weghen van Norweghen vmme daghe to sprekende vmme ene ewighe zøne. Des wart up eenghedreghen, dat me enen merklike boden schal to dem koninghe senden mit enem breue vmme daghe to ramende ieghen sunte Wolburge dach; de schal eme ok de daghe breve bringhen, de eme de menen stede besegheld hebben. Ok schal me dem boden mede bevalen de klaghe der stede Rostok, Sund, Wismer vnde Prussen vmme dat eren borgheren ghescheen is in Norweghen bynnen dessem daghe. Dit sint de stede, de ere breve dar ghesant hebben: de van Lubeke, de van Hamborch, van Bremen, Rostok, Sund, Wismer, Gripeswold, Stetin, Colberghe, Campen, Herderwijk, Dordrecht, Deventir, Zutphane, Amsterledamme, Sirixe^a D.v.s. Zierikzee., Ankhusen; de stede van Prussen alle enen breff mit ses jngheseghelen vnde de stede van Liflande alle enen breff mit veer jnghesegelen. De bode, den me senden schal to dem koninghe van Norweghen, de schal ok wedderbringhen den bref den eme de bode gheuen, de dar weren ouer enem jare, do se de daghe deghedingheden to dem Bauahus; vnde wat de bode vorteret dat schal men nemen van dem menen pundgelde. De breff, den me dem koninghe sendede by dem vorsechten boden luddede aldus von worde to worde alse hir nascreven steit (se nr 8933 nedan). (- - -)