SDHK-nr: 4592

Benedictus Episcopus seruus seruorum Dei dilectis filiis preposito decano et archidiacono ecclesie v[p]salensis Salutem et apostolicam benedictionem Querelam dilecti filii henrici hartmanni rectoris ecclesie de saxamæki(1) aboensis dyocesis accepimus continentem quod licet priori generali et fratribus ordinis predicatorum per apostolice sedis priuilegium indultum fore dicatur vt possint habere altare portatile super quo in locis et villis quibuslibet sine preiudicio tamen Parrochialium ecclesiarum missam et alia diuina officia celebrare valeant tamen prior et fratres domus dicti(2) ordinis prope ciuitatem Aboensem pretextu indulti huiusmodi in parrochia dicte ecclesie saxamæke(3) super altari portalili missam et alia diuina officia celebrare et ad missam et diuina huiusmodi parrochianos dicte ecclesie conuocare et oblaciones recipere ac in vsus suos conuertere propria temeritate presumunt in eorundem rectoris(4) et ecclesie preiudicium et grauamen Cum autem dictus rector sicut(5) asserit dictorum prioris et fratrum dicte domus potenciam merito perhorrescens eos infra ciuitatem seu dyocesim aboensem negaret(6) conuenire secure Discrecioni vestre per apostolica scripta mandamus quatinus vocatis qui fuerint euocandi et auditis hincinde propositis quod iustum fuerit appellacione remota decernatis facientes quod decreueritis per censuram ecclesiasticam firmiter obseruari Testes autem qui fuerint nominati si se gracia odio uel timore subtraxerint censura simili appellacione cessante cogatis veritati testimonium perhibere Non obstante si eidem ordini a sede apostolica sit indultum quod persone eiusdem ordinis ad iudicium aut suspendi uel excommunicari seu ipsi uel dicti ordinis loca interdici non possint per litteras apostolicas non facientes plenam et expressam ac de verbo ad verbum de indulto huiusmodi mencionem et qualibet alia dicte sedis indulgencia generali uel speciali cuiuscumque tenoris existat per quam presentibus non expressam uel totaliter non insertam nostre iurisdiccionis explicacio in hac parte valeat quomodolibet impediri que quo ad hoc ipsis volumus aliquatinus suffragari Quod si non omnes hiis exequendis potueritis(7) interesse duo vestrum nichilominus exequantur Datum Auinione V kalendas Junii Pontificatus nostri Anno Sexto.