SDHK-nr: 4312

Omnibus presens scriptum cernentibus. frater petrus diuina miseracione archiepiscopus vpsalensis. salutem jn domino sempiternam Jlla libenter admittimus illa tota animi deuocione, summoque mentis desiderio prosequimur et fouemus, que pro cultus ampliacione diuini. ac fidelium dei, tam viuorum quam mortuorum optato solacio statuuntur aut fiunt Jgitur, tam posteris quam modernis notum facimus per presentes. Nos ex communi et vnanimi Capituli nostri consilio et consensu. nostrum adhibuisse beneplacitum et assensum. ac auctoritatem ordinariam prestitisse. quod vir honorabilis johannes dictus gismar quandocunque Ciuis stokholmensis nunc autem lybycensis. pia ad hoc vt videtur deuocione affectus jn ecclesia beati nicholai stokholmis ad honorem dei, sueque matris gloriose, sanctorumque omnium, ac parentum et propinquorum suorum remedium, vnum altare cum prebenda congrua Cui per presbiterum de cetero seruiatur perpetuo de nouo instituere valeat et fundare cum condicionibus que sequntur Jn primis quidem jdem gismarus Cappellam conuenientem, pro et cum altari predicto in ecclesia prefata exstrui et edificari faciat, ac absque dicte ecclesie grauamine quocumque, pro eodem altari ornamenta, et alia quelibet necessaria decencia ministrari in suis sumptibus et expensis, Jta. quod diuina decenter inibi valeant cottidie celebrari ac pro presbiteri seruientis et diuini seruicii continue impendendi ibidem sustentacione debita, et honesta, octo marcharum puri argenti ponderis stokholmensis vel eiusdem ualoris pecuniam pro tempore currentem redditus perpetuos et infallibiles assignabit. Quem quidem presbiterum, idem gismarus, ac eius posteri, ab ipso directe et legittime descendentes vsque ad quartum gradum inclusiue, vndecumque dictus presbiter fuerit, dum tamen alias dignus et ydoneus inueniatur. ad idem altare cum vacauerit, nobis vel successoribus nostris poterint presentare, post gradum vero eundem, nullo eiusdem gismari posterum, presentandi iure seruato. Nos vel successores nostri eidem altari vel prebende poterimus de persona ydonea libere prouidere. Huiusmodi presbiterum ad certa reddenda seruicia pro diebus singulis, vel septimanis, jdem gysmarus precise non limitet, set eius conscienciam oneret de missis vel aliis deo deuotis oracionibus dicendis, prout diuina sibi gracia duxerit inspirandum. Jta tamen quod diebus dominicis et festiuis, in choro dicte ecclesie vna cum ministris et vicariis ibidem misse. matutinis et vesperis. teneatur huiusmodi presbiter interesse. Jn huius autem ordinacionis et admissionis nostre euidenciam pleniorem, sigillum nostrum vna cum sigillo capituli nostri, presentibus duximus apponendum. Datum apud ecclesiam thorstunæ nostre vpsalensis dyocesis Anno domini M°. CCC°. tricesimo septimo. sabbato jnfra octauas epyphanie.