SDHK No: 5536

Omnibus presens scriptum cernentibus. Johannes andresson de Husæ, Salutem in domino sempiternam. Ne gestarum rerum memoria processu temporis euanescat et pereat, discretorum virorum prudencia solet eas per litteras eternare, Nouerint vniuersi me monasterio bosø, duas curias meas in kastbyerghæ in parrochia saxolthorp sitas, in quarum quidem vna residet petrus hakonson. et iu altera petrus barkare, cum omnibus et singulis earum pertinenciis, mobilibus et inmobilibus, videlicet Estimacionibus, pensionibus, agris, pratis. siluis. pascuis humidis et siccis, nullis exceptis, libere dedisse, legasse, resignasse ac in presencia venerabilis patris, domini Petri Archiepiscopi Lundensis totaliter et legaliter scotasse iure perpetuo possidendas. Tali condicione prehabita quod post obitum meum dilecteque vxoris mee botildis, moniales ibidem anniuersarium nostrum in Ecclesia sua sollempniter celebrare debeant annuatim. Jta tamen quod monialibus que missis et vigiliis ipso die anniuersarii nostri interfuerint. dimidia marcha denariorum nouorum de predictarum curiarum redditibus, dabitur, inter ipsas equaliter diuidenda. Jnsuper me et heredes meos, predicto monasterio curias prefatas, cum omnibus suis adiacenciis antedictis, ab impeticione et alloqucione omni quorumcumque, ad appropriandum. quitandum, et liberandum, obligo per presentes. Jn cuius rei testimonium sigillum meum vna cum sigillis virorum discretorum dominorum Andree prepositi lundensis. Thorkilli byerneson canonici ibidem, et Nicholai dicti gagge armigeri, presentibus est appensum. Datum lundis. Anno domini Millesimo. CCC°. Quadragesimo septimo. crastino beati thome apostoli.