SDHK-nr: 6783

Premissa condigna salutacione seruicii et honoris. Quemadmodum discrecioni vestre nuper transscripsi, quod dominus Andreas Neghelssen una cum Veregheden et Johanne Deken laborauerunt homicidio et incendio per Lubicenses ciues et Stetinenses peracto me et vestros ciues fraudolenter inmisceri, et pronunc laborant nos pro homicidio per Bertoldum de Monasterio dudum perpetrato agrauare et diuersis blandis sermonibus doloque multifario et minis quam pluribus me invaserunt. Ego autem super meram iusticiam me firmabam et libertatem conquerencium pariter et iudicum, qui tantum querelas contra ciues Lubicenses et Stetinenses proposuerunt. Hinc scitote, quod consilium fecerunt occultum, quod ignoro, sed credo, quod volunt me habere ad presenciam regis Swecie, qui in breui versus Helsingheborch erit venturus. Quapropter vestram prudenciam precibus inclitis exoro, quatinus mihi responsum iuxta vestrum prudens consilium reformetis, quomodo sim facturus et ciues vestros honeste defensurus, quia de die in diem nouas et maliciosas excogitant inuenciones, qualiter me poterint molestare fraudolenter et agrauare. Valete in Christo. Scriptum crastino die beati Mathei meo sub sigillo.Per Johannem Buxtehuden.