SDHK-nr: 5733

Omnibus presens scriptum cernentibus Johannes Gozswensson in Domino salutem sempiternam. Tenore presencium recognosco me nobilibus et discretis viris Philippo Laurensson et Finuido fratribus, Nicholao Benedicti et Holmgero Joonsson quinque solidos terre in Hunningiæbyy, parochia Bughløsæ, Vpsalensis diocesis, sitos, cum suis pertinenciis vniuersis ex causa permutacionis et concambii prediorum, mihi per eos in Vallibus traditorum, rite et legittime dimisisse, jus, possessionem et proprietatis dominium dictorum prediorum ad me jure hereditario legittime deuolutorum in eosdem Philippum, Finuidum, Nicholaum et Holmgerum ac heredes et successores suos totaliter transferendo. Si vero prefatos quinque solidos terre in posterum per quempiam inpediri contingat quacumque ex causa, quominus ipsi dictis prediis vti et gaudere libere valeant ac pacifice et quiete: extunc a tempore note arrestacionis, sequestracionis seu impedicionis bonorum premissorum infra mensem et mensis spacium, proximo sequens, dilacione vlteriori quacumque cessante, quinquaginta marchas denariorum monete nunc currentis ego Johannes supradictus me per presentes ad soluendum obligo realiter et tradendum. In cuius testimonium sigillum meum vna cum sigillis fratrum meorum Gozssweni et Jacobi presentibus est appensum. Datum Arosie anno Domini m°ccc°xl°nono sabbato proximo ante dominicam passionis Domini.