SDHK-nr: 5968

Wi Albert vnde Johan brudere, von Godes gnaden herthogen tu Meclenborch, tu Stargarde vnde tu Rozstok heren, bekennen vnde bethugen openbar in dessen breue, dat wy dedinghet hebben mit herthogen Ericke van Sassen deme junghen, vnsen liuen ome, vnde heren Benedictus van Anefelt, heren Clause van der Jure vnde heren Boø Valken, ridderen, vmme alle schelunghe vnde twidracht, de tuschen deme erbaren vorsten vnsen heren Woldemare, konighe tu Denemarken, vnde sinen mannen vnde deneren van ener weghene, vnde vns, vnsen mannen vnde deneren, de van vnser weghene in desse schelunghe komen sint, van der ander weghene is vnde wesen het jengerleye wis, dat de gentzliken berichtet vnde vorsunet is in gantzer vruntscap also: - - - - - - - - (rörande giftermål mellan Margareta och hertig Henrik samt hertigarnes beläning med Rostock) - - - - - - - - Vortmer vmme alle schelunghe, de tuschen marcgreuen Lodewige van Brandenborch vnde vns is vnde wesen heft, de het de vorbenumede konigk vnse here berichtet vnde vorsunet, also verne alse de marcgraue dat stede holden wil; wil he auer des nicht dun, so scal des vorbenumeden konighes, vnses heren, dink vnde vnse bliuen gentzliken eyn, alse vnse breue spreken. Wer auer dat de sune tuschen den vorbenumden marcgreuen vnde vns vor sik ghinge, alse ghededinged is, vnde dar na tuschen vns jengerleyge scelunghe worde, de scal vnse here de konigk vorminnen, oft he kan. Kan he des nicht dun, dar scal he rechtes weldich wesen van vnser weghene.Wert vortmer dat wy schelunghe hedden edder wnnen mit herthogen Ericke van Sassen vorbenumt, herthogen Wertslawes kinderen van Stetyn vnde mit greuen Johan van Holtzen, de scal de vorbenumede konigk vnse liere vorminnen, oft he kan; wor he des nicht dun kan, dar scal he rechtes weldich sin. Vortmer wert dat de vorbenumede konigk, vnse here, scelunghe hedde edder wnne mit vnsen vrunden, Magnus, konighe tu Sweden, hertoghen Haken, sinen bruder(sic!), Johanne, Hinricke, Clause vnde Gherde, greuen tu Holtzen, Johanne, hern Clause, sinen sonen, Clause vnde Bernde, heren tu Werle, de scole wy vorminnen, oft wy konen. Wor wy des nicht dun konen, dar scole wy rechtes weldich sin. Vortmer tu ener mereren stederen vruntscap so vorbinde wy Albert vnde Johan, herthogen vorbenumet, vns tu deme vorbenumeden konighe Woldemar, vnsen heren, vppe rechte bruderlike truhe em tu behulpende wesen, vp aller malke, also scal he vns wedder dun. Welk vnser der hulpe van deme anderen bedarf, de scal id deme anderen ses weken vor tu weten dun. Alle desse vorbenumeden stucke stede vnde vast tu holdende sunder jengerleye arghe lyst, dat loue wy Albert vnde Johan brudere, herthogen tu Meklenborch vorbenumet, in truhen deme vorbenumeden konigk Woldemar, vnseme heren, vnde scolen dat sweren in den hilghen, wen wy erst tusamene komen. Dit hebben ok mit vns ghelouet in truhen vnse truhen leuen Otto, greue tu Vorstenberche, her Johan van Plesse vnde her Rauen van Barnekowe, riddere, vnde hebben ere ingheseghele mit vnsen an dessen bref ghehenget, de ghegheuen unde schreuen is tu Lubek na Godes bord drutteynhundert jare in deme veftegesten jare, des sunnauendes in de achte daghen der hemeluart vnses heren Godes.