SDHK-nr: 2704

Jn nomine patris, filii et spiritus sancti Amen. Ego Johannes dictus Bær mente compos et corpore validus, considerans, quod omnia que sub celo sunt, ex nihilo condita sunt, et ad suam originem tendunt vniuersa, et hoc solum de rebus transitoriis post huius vite transitum non transire dinoscitur quod ad pietatis opera misericorditer erogatur. Jdeo in semper benedicto Trinitatis nomine, de rebus mihi ab ea licet immerito largissime concessis, Testamentum meum condo in hunc modum. Jmprimis Monachis in Alvastro, apud quos diutina deliberacione mihi eligo locum sepulture, confero dimidiam partem octonarii Husaby in Grennum situm, si me absque liberis de hac vita migrare decreverit clemencia Salvatoris. Si vero me prolem superstitem habere contingat, volo ut funus meum deferri faciat infra annum post diem obitus mei ad claustrum memoratum, ac predictis Monachis XL marchas integraliter persolvant, alioquin sepedicti Monachi funus meum ad locum memoratum decenter devenire facient, et sic eis predictus dimidius octonarius cedat perpetuo possidendus. Jtem [ut] multiplicatis intercessoribus pater misericordiarum facilius ad misericordiam inclinetur, lego ecclesie in Rugbyerhum duas marchas, et sacerdoti ibidem unam marcham. Jtem ecclesie in Jarunxtorp dimidiam marcham, et dimidiam sacerdoti. Jtem ecclesie in Bancharyud dimidiam marcham et dimidiam sacerdoti. Jtem fratribus Minoribus Junacopie lego unam marcham. Ad ista data atque legata singula persolvenda impignero predium meum in Magnusaryud, sicut Reverendis viris atque discretis, domino Abbati in Alvastro, et domino meo carissimo domino Laurencio Ulffson, nec non et consanguineo meo Magno Siggasson, quos ego peto atque constituo fieri executores huius mei Testamenti irrevocabiliter ordinandi taliter, quod si heredes mei hanc donacionem meam ante annum, post diem obitus mei non adimpleverint, ipsi executores predictum predium licite vendere possunt pro competenti precio, de quo precio primo persolvant Testamentum reliquum autem cedat in meorum usus heredum. Jn huius rei evidenciam sigilla discretorum virorum, scilicet Reverendi domini Abbatis de Alvastro, et domini Laurencii Ulffson et Magni Siggasson una cum proprio duxi apponenda. Datum Anno domini M. CCC. XV. in die Beati Briccii Confessoris.