SDHK-nr: 19180

Vniuersis christifidelibus, ad quos presentes litere peruenerint, soror Gerdheka abbatissa et frater Ericus, confessor generalis, ac vterque conuentus monasteriorum Marie virginis et Birgitte in Watzsteno, Lyncopensis diocesis, in regno Swecie, salutem in omnium Saluatore. Vt a discretis itinerantibus sinistre suspicionis tollatur occasio, necesse est eos vite et conuersacionis testimonio premuniri, exhibitores igitur presencium J[ohannem Haquini] et J[ohannem Hildebrandi] presbiteros, confratres et filios nostros karissimos, viros religiosos et deuotos, ad omnes sacros ordines tam inferiores quam mayores rite et canonice promotos, non suspectos, non excommvnicatos, non interdictos nec in aliqua irregularitatis nota, quantum humano constare poterit iudicio, respersos, ad Romanam curiam, fauente Domino, transituros, caritati vestre sinceriter in Domino recommendantes, vos et quemlibet vestrum humiliter et affectuose rogamus pro eisdem, quatenus ipsos in huiusmodi itinere suo eundo uel redeundo casu vel proposito diuertentes amore Dei et nostre peticionis intuitu benigne velitis colligere et humaniter pertractare, non sinentes eos in personis seu rebus a quoquam indebite molestari, mercedem ab eo recepturi, qui caritatem precipit et premiat obseruantes, et nos eciam pro modulo nostro erga illorum promotores condigna vicissitudine promereri volumus requisiti. Datum monasteriis nostris, anno Domini millesimo quadringentesimo decimo octauo, ix die mensis Decembris, sub sigillo nostro apposito presentibus impendenti.