SDHK-nr: 19254

Sincere dileccionis in Christo constanciam, de cursu brauium et de labore gaudium consequi sempiternum. Venerabilis in Christo karissime! Receptis literis vestris mihi per ostensorem presencium in domo mea presentatis gaudio gauisus sum de incolumitate vestra, sed territus reuera quod istis diebus, quibus calores intentissimi presertim in illis partibus ad quas tenditis, prout omnium rerum magistra, experiencia videlicet propria vos docuit, obsequntur, vos exponere non trepidatis, sed caritas Christi et zelus religionis, que vos militem Domini et adletham prestantissimum consecrarunt, que quidem caritas non agit perperam, que vite celestis ymaginem representat, quam non alterat casualis euentus, quam separacio corporalis non diuidit, quam temporalis longitudo non abdicat nec eciam interrumpit, ad istum nouum vos inuitant laborintum (!); quocirca, mi pater prekarissime, legalitati vestre ad plenum regraciari non valeo, quod in presencia preclarissime domine nostre regine de bonitate vestra solita de me vermiculo, qui non sum dignus coram tanta celsitudine regia in aliquo commendari, benigne senciistis. Pretermitto igitur singula, ad que punctatim literis vestris merito respondere debeo, dileccioni vestre significo me pro hac vice et tam subito pro votis et desideriis vestris exequendis non bene dispositum, sed inducit me affeccio singularis, qua erga legalitatem vestram sinceriter afficior, et clausula vna literarum vestrarum, que canit quod die dominica proxima proponitis iter vestrum arripere dummodo perantea venerint litere pretacte Serenissime domine nostre cum clenodiis etc., de qua materia lacius canunt eedem litere vestre. Quamobrem, mi pater predilecte, non displiceat vobis expectare in Marienwold usque ad dominicam Misericordia Domini, quia interim laborabo apud capitulum ecclesie Verdensis et dominum episcopum ibidem vt modis et viis conuenientibus ad tempus modicum abesse valeam et votis regiis atque vestris sub proteccione diuina complacere. Scio itaque tres legales viros ad hanc viam dispositos, quos ad societatem nostram, vt spero, fraternaliter inducam, ita vt in certis loco et termino vobis exponendis vobis occurant. Disponam eciam interim de factis meis prout potero et ante pretactam dominicam in loco prefato, volente Domino, vos videbo et tunc de singulis vobiscum conferam, et si tunc vota nostra dominus concordauerit, offeram me totaliter beneplacitis vestris, vt de me tamquam de persona vestra propria, prout volueritis, faciatis. Preterea retardacio modica huiusmodi itineris negocia vestra impedire non poterit, cum dominus noster ante mensem Septembris de Florencia aut de ciuitatibus Pisana seu Senensi, que confrontate sunt, se non mutabit. Valete diu feliciter et felicitas et gaudium vos sequantur, etc.