SDHK-nr: 6374

Omnibus presens scriptum cernentibus Karolus Vlfsson salutem in omnium Saluatore. Cum prout moris est, sponsa a sponso merito habeat honorari, ne erroris mater, obliuio, materiam generet litigandi vel lapsu temporis fiant dubia, que sunt presentibus luce clarius manifesta, tenore presencium tam posteris quam modernis pateat euidenter me consorti mee dilecte Ingridi Eriksdottir racione dotis seu donacionis propter nupcias curiam meam villicalem Strandby necnon cetera bona mea in Stafby et Grimsøø parochie Bondæarnøø cum omnibus eorum attinenciis, videlicet agris, pratis, pascuis, siluis, piscariis, coloniis, molendinis et molendinorum locis ceterisque suis adiacenciis nullo penitus excepto, quocumque nomine censeatur, per presentes fauorabiliter contulisse condicionibus, que sequntur, non omissis, quod superstiti nostrum alio, cum Deus voluerit, decedente, si liberos inter nos non procreari Deus permiserit, solucione qualibet postposita predicta bona cum premissis suis attinenciis cedant irreuocabiliter possidenda, liberis autem nostris, si quos Deus inter nos procreari voluerit, bona pretacta cum adiacenciis suis, vt premittitur, titulo matrimonii et non patrimonii adaptentur perpetue possidenda quocumque adinuencionis ingenio contra premissa minime valituro. Premissorum bonorum donacioni presentibus firmariis infrascriptis, videlicet [dominis] Karolo Naskunungsson, Rørico Bondæ, Karolo Vlfsson et Philippo Rang[wald]sson militibus, et dominis Johanne Karlsson Vpsalensi et Byrghero Gregorii Strenganensi canonicis, Vernero de Kyrnæ, Finuido Finuizsson, Karolo Thyrnisson, Benedicto Fathirsson, Swenone Fathirsson, Birghero Niclisson armigeris, forma rituque legum patrie in premissis [dili]genter habitis et obseruatis. . [In] quorum testimonium et euidenciam firmiorem sigillum nostrum presentibus est appensum. Et nos Nicholaus Abyornæson, Puko Glysing, Eringislo Sunason et Benedictus Algutzson milites et Margareta Sunadottir ex parte liberorum meorum prescriptam donacionem ratificare volentes sigilla nostra presentibus fecimus coapponi. Scriptum in curia Thyptum anno Domini m°ccc°l° secundo feria secunda proxima post inuencionem sancte crucis.