SDHK-nr: 16775

Vruntlike grute mit erwerdicheit vorscreven. Jw, erwerdige gheistlike here, her homeister, do wy Margrete van Godes gnaden konyng Waldemars dochter to Dennemarken witlik, dat do wy hir to landen to unses zones konyngh Erikes unde unser dochter der konynginnen hochtiit qwemen, do berichtede uns unse zone wol, unde ok de ghenne, de by em to Calmarn weren, do de juwen d$ar n.u latest weren, dat unse zone nenen ende krech van den juwen umme Gotlandt unde Wisbu, alse wy wol gehopet hadden, m$er dat id stande bleiff up de 6 weken vorwoerd, als it er to Valsterbode etc. begrepen wart, dat uns to male leet is, dat hee unde de juwen sik in anderer mate nicht en schededen. Unde dat wy dar nicht by komen konden, dat seghede wy den juwen to vorne, wente wy mosten der vorbenomeden unser dochter warden, van see van Englande queme. Unde hadde God wolt, dat des nu. eyn ende tusschen unsem zone unde jw worden hadde, so hadde jw de brieff, den de konyngh utegheven heft, wol gewurden, den wy den juwen seen leten, do see nu lest in Jutlande by uns weren. Ok is uns wol berichtet, dat de juwe also lange nicht beiden wolden, dat wy d$ar by mochten komen hebben; ok wolden see nicht umme segelen in dat Høll, dat wy mit mere des rikes rade d$ar by mochten gekomen hebben. Nu, erlike here, na deme male dat de juwen also wech voren, alse vorscreven steit, werit sake, dat it Gode unde jw unde den juwen behegelik were, dat wy dar umme spreken unde arbeideden, dat eyn ander dach geholden wurde zomerlank tusschen unsem zone unde jw in deme Oressunde, dat gi de juwen mit vuller macht d$ar by wolden senden, unde dat de stede, de d$ar er by wesen hebben, dar ok denne mochten by komen, unde oft gi wolden, dat unse sone deme konynge van Englande toumbode, dat hee de synen d$ar ok by zande, so hope wy, dat hee des nicht en lete, alse wy berichtet siin, uppe dat, oft de hillige geist syne gnade d$ar to keren wolde, dat yemant d$ar ichtes gudes to spreken, ramen unde doen konde, dat to vrede unde guder eyndracht drapen mochte al umme, unde wolde God, dat wy ichtes wes gudes to dessen vorscreven saken denen unde doen konden, so wete gi wol, dat wy dat gerne daen hebben unde noch gerne doen. Vortmer umme dat gud, dar gi unde de juwen uns van schreven hebben, dat heft al zudder legen unde licht noch, alse de juwen in zomere van uns schededen unde bet also lange, dat wy weten oft gi uns eyn antworde van dessen vorscreven saken wedder schriven willen eder nicht. Erlike here, denket dar up, dat unse zone unde desse rike muchten dat ere weder krigen, unde dat van Gotlande unde Wisby vele arbeides, koste unde sorge entstan is; God gheve unde voghe dat also, dat d$ar nicht mer arges van entsta. Unde wetet, dat wy juwen steden in Prusen schreven hebben by der sulven mate jw to berichtende, wente see er by den degedingen wesen hebben. Erlike here, dut nu unde bewiset jw in allen saken, alse unse zone unde wy juwer erlicheit wol toloven, unde latet ene mit synen vrunden dat beste vurder jegen jw vorschulden. Unde wil God, dat em dat syne wedder wart, so hope wy, hee en mach jw mit synen vrunden mer unde vorder to denste werden mit Godes hulpe. D$ar mede beghere [C: bevele] wy jw Gode, unde begeren desser vorscreven stucke eyn gutlik unde enkit antworde by dessem boden, unde dat gi ene dar mede varlosen van jw vorderen, d$ar bidde wy gerne umme. Scriptum in Civitate Lundensi 1406 sabbato ante fastum beati Martini episcopi.