SDHK-nr: 5004

Jn nomine patris et filii et spiritus sancti Amen, Ego Margareta Aberni filia mente et corpore compos, attenta consideracione pensaris quod humane condicionis fragilitas, nil stabilitatis, nil certitudinis optinens, nunc aduersis depressa, nunc prosperis elata, inter mundanas varietates anxia fluctuat requiem querens quam in huius seculi campo inquietudinis pleno non inuenit nec in aliqua creatura, nisi in illum tota mente se conferat in illo mentis aciem figat in quo vera sunt gaudia et requies sempiterna, Volens in ipsum tam quod sum quam quod habeo referre et secundum sapientis consilium diem malam tenebrosi temporis precauere et horam mortis incertam secundum amministratam desuper graciam operibus quibus possum misericordie preuenire, vt ex hiis quibus me largitor bonorum et distributor honorum copiosa sue mere liberalitatis gracia honorauerat in hac vita, ipsum possim lucrifacere in eterna, in honorem suum et anime mee ac dilecti mariti mei Johannis bone memorie remedium testamentum facio, ordino, et condo in hunc modum, Primo monasterio Noueuallis ducentas marchas denariorum vsualis monete, confero in hiis scriptis pro quibus soluendis curiam meam suenamo titulo pignoris eidem obligo, ita tamen quod heredes mei infra annum continuum et diem, a tempore obitus mei ipsam curiam pro predicta pecunie summa, redimendi liberam habeant facultatem, alioquin ex tunc eadem curia cum domibus, agris, pratis, pascuis, siluis, piscariis, ac aliis suis pertinenciis quibuscumque, intra sepes et extra, longe vel prope positis, Mobilibus eiusdem curie dumtaxat exceptis, sibi cedat perpetuo ac irreuocabiliter possidenda, transferendo in ipsum monasterium plenum proprietatis ius et possessionis dominium, prefatam curiam cum suis pertinenciis vt premissum est possidendi, alienandi, ac alio quocumque modo pro sue libito voluntatis ordinandi Jnterdicta mihi omni facultate hanc ordinacionem meam mutandi, cassandi, seu infringendi, eciam si aliud testamentum facere me contingat, Jn cuius rei euidenciam pleniorem sigillum meum ac sigilla dominorum vlphonis abyornason militis. Wemundi canonici lincopensis et wexionensis, Haquini canonici lincopensis necnon et algoti curati in gellarydh, ad instanciam et peticionem meam presentibus sunt appensa, Datum apud eandem curiam Anno ab incarnacione domini. M°. CCC° quadragesimo quarto, Jn dominica trinitatis.