SDHK-nr: 2588

Byrgerus dei gracia sweorum gothorumque Rex Omnibus et singulis parrochianis ecclesiam Husaby inter wykæ inhabitantibus in domino dileccionem et salutem Quia ob interposicionem et consilium venerabilis patrjs Dominj N. dei gracia archiepiscopi vpsalensis liberaliter consensimus quod predicta vestra ecclesia propter bonum pacis tollenda pericula maiora et scandala remouenda canonie quam de facto in ecclesia lincopensi obtinet Magister nicholaus Sigwasti canonicus Lincopensis secundum quod in nostris litteris super hoc confectis continetur expresse perpetuo sit annexa Volumus et districte precipiendo mandamus quatinus magistro Nicholao tamquam nostro dilecto clerico et presbitero suo tamquam vestro curato cum obediencia et reuerencia debitis de omnibus iuribus parrochialibus eo deuocius et peramplius deinceps studeatis exhibere iusticie complementum, quo ipsa vestra ecclesia iam diucius vacillauerat non absque grauibus periculis animarum et ipsius magistrj nicholaj dispendium [d.v.s.: dispendio] et iactura Speramus enim firmiter quod in omnibus que supradicte uestre ecclesie commoda et vestram consolacionem spiritualem respiciunt vobis sicut pater preesse debeat et prodesse Datum apud wastenar Anno dominj M° CCC° tercio decimo die beati francisci confessoris.