SDHK No: 3485

Omnibus presens scriptum cernentibus frater Petrus Abbas Ringstadiensis, Andreas Pæterson de Allandorp Jacobus Niclæsson ranæ, milites, Nicolaus Sweygh. Jvarus Jvarson, Johannes Jvarson Nicolaus Krook, Nicolaus Denkæn, Nicolaus Jønesson de Kwærkæby et Godrinus Magnusson Armigeri. salutem in Domino sempiternam. Ne quod veritas approbat a posteris trahatur in dubium litterarum testimonio solet perhennari. Constamus igitur omnibus et singulis presentibus et futuris Nos sub Anno Domini Millesimo Trecentesimo vicesimo septimo feria quarta proxima ante festum beati Bartholomei Apostoli in placito generali Syelandie personaliter constitutos fuisse vidisse et audiuisse, quod Dominus Ericus Valdemari contra fratrem Tuchonem, ordinis fratrum predicatorum priorem prouincialem Dacie Suecie et Norvegie et fratrem Benedictum Priorem ordinis eiusdem Roskildis super bonis omnibus et singulis et vbicunque locorum infra regni Dacie terminum sitis monasterio beate Agnetis virginis Jbidem scilicet Roskildis per inclitas Domicellas Agnetern et Juttæ clare memorie in eodem placito generali juste et legaliter datis et scotatis, querimoniam proferebat, asserens se melius jus quam dicti fratres nomine dicti monasterii habere in eisdem, at illi dicti fratres ex parte monasterii eiusdem e conuerso respondebant dicentes dicta bona omnia et singula antedicto monasterio sancte Agnetis racione vere donacionis et scotacionis vt premissum est juste et legaliter attinere. Vt autem dicta causa inter eos rite et racionabiliter ac secundum juris exigenciam, eo melius citiusque finiri et determinari valuisset, Jdeo dominus Ericus supradictus ex vna parte nomine sui, et frater Benedictus antedictus ex altera parte nomine monasterii antedicti, Cui frater Tucho supradictus prior prouincialis plenam potestatem et auctoritatem in eodem placito dictam causam rite et discrete terminandi et finiendi commisit penitus et assignavit, denominacionem terre que dicitur Lands næfnd, in qua duodecim meliores et discreciores terre Syelandie nominati et scripti esse dignoscuntur, videlicet Dominus Jngvarus Hyort, Dominus Kanutus Niclæsson, Dominus Nicolaus Tuuoson, Dominus Johannes Olæfson, Dominus Nicolaus Absolonis, Dominus Petrus Grubbe, Milites, Johannes Duuæ, Nicolaus Mandorp, Nicolaus Jønæsson de Kwærkæby Olavus Jønæsson de Pæterstorp, Matheus Taa de Krakæthorp et Johannes Magnusson Rector eiusdem placiti, Armigeri tunc temporis in dicto placito firmauerunt, Promittentes se quod quicquid per dictos nominatores rite et racionabiliter factum fuerit in premissis ratum ac firmum totaliter et omnimode velle tenere et habere, qui quidem nominatores ad agendum jurandum et determinandum super causa antedicta feria quarta proxima post purificacionem beate Marie nunc instantem ad dictum placitum debent conuenire. Ne autem aliqua dubitacionis materia super huiusmodi protestacione per nos facta, ab aliquibus in posterum debeat suboriri, presentes litteras sigillorum nostrorum munimine fecimus roborari, in testimonium et cautelam firmiorem. Datum Ringstadis, Eodem placito anno et die supradictis.