SDHK-nr: 6760

Omnibus presens scriptum cernentibus Nicholaus Pæterson de Asmundæthorp salutem in Domino sempiternam. Nouerint vniuersi me honorabili viro domino Petro Stighson de Krappæthorp militi, presencium exhibitori, curiam meam in Bollæthorp sitam, in qua Nicholaus Michaelis residet, quam curiam post obitum matris mee dilecte iure hereditario habui, cum agris, pratis, pascuis, siluis, piscaturis in ambobus stagnis prope Bollæthorp et alibi, vbicumque sint, estimacionibus, domibus ceterisque aliis pertinenciis suis, mobilibus et inmobilibus, nullo excepto, in recompensam vnius curie in Øthæslef site, in qua Paulus Laurencii residet, alienasse, resignasse ac in placito generali Scanie scotasse iure perpetuo possidendam. Obligo igitur me et heredes meos per presentes firmiter et districte ad appropriandum eidem domino Petro et heredibus suis prefatam curiam et ad liberandum ipsam ab impeticione cuiuscumque. In cuius rei testimonium sigillum meum vna cum sigillis discretorum, videlicet dominorum Joseph Niclæsson et Iohannis Stighson canonicorum Lundensium et Mathie Costentenson de Bossyo, presentibus est appensum. Datum anno Domini m°ccc° l° quarto in festo beati Olaui regis et martiris.