SDHK-nr: 6847

Petrus, miseracione diuina archiepiscopus Vpsalensis, dilecto filio domino Nicholao Asonis, vicario perpetuo in ecclesia beate Virginis Vpsalie, dileccionem in Domino et salutem. Cum in iure Caueatur, vt qui ecclesiam habet parochialem dignitati vel prebende annexam, in ea habere debeat vicarium ydoneum et perpetuum canonice institutum, nos te in ecclesia beate Virginis Vpsalie predicta, prepositure ecclesie nostre Vpsalensis annexa, vicarium perpetuum ordinandum duximus, statuentes, vt de ipsius ecclesie prouentibus preposito eam optinenti quindecim marchas denariorum vsualium in duobus terminis, videlicet sex marchas in octaua epiphanie et nouem marchas denariorum infra octauam pasche, annuatim soluere, donec fundum presbiteralem ad eandem ecclesiam spectantem per culturam debitam ad fertilitatem congruam redigere valeas, ac de procuracionis archiepiscopalis onere respondere tenearis. Anno tamen quo visitacionis onus sustinueris, ad soluendum duodecim dumtaxat marchas de ipsa ecclesia volumus te astringi. Idcirco ecclesie predicte tibi curam ac amministracionem in spiritualibus et temporalibus committimus, iniungentes parochianis ibidem, quatinus tibi de omnibus iuribus parochialibus exhibeant iusticie complementum. Datum apud manerium nostrum Arnø anno Domini m° ccc° quinquagesimo quinto dominica prima post octauam pasche sub nostro sigillo.